បរទេស៖ យោងតាមការចេញផ្សាយ របស់ទូរទស្សន៍ BBC នៅថ្ងៃព្រហស្បតិ៍នេះ បានឲ្យដឹងថាមន្ទីរពេទ្យមួយកន្លែង ដែលប្រើប្រាស់ សម្រាប់ថែរក្សាទារកនិងមាតា នៅក្នុងទីក្រុង Mariupol ប្រទេសអ៊ុយក្រែន បានទទួលរងការវាយប្រហារ តាមអាកាស ពីសំណាក់កងកម្លាំងយោធា របស់ប្រទេសរុស្សី។
ប្រធានាធីបតី អ៊ុយក្រែន លោក Volodymyr Zelensky បានថ្លែងថាមនុស្សជាច្រើន បានជាប់នៅពីខាងក្នុងអគារ ដែលរងការខូចខាតយ៉ាងធ្ងន់ធ្ងរ ហើយព្រមទាំងបានធ្វើការអំពាវនាវ សាជាថ្មី ចំពោះ មេដឹកនាំលោកខាងលិច ក្នុងការបិទតំបន់ ហោះហើរ។
លោកប្រធានាធិបតីរូបនេះ ក៏បានបង្ហោះរូបភាព ជាច្រើនពីខាងក្នុងមន្ទីរពេទ្យផងដែរ ដែលអាចឲ្យគ្រប់គ្នា មើលឃើញអំពីភាពខូចខាត ធ្ងន់ធ្ងរនៃអគារមន្ទីរពេទ្យ នោះទាំងស្រុង។
ទោះបីជាយ៉ាងណាក្តី មន្ត្រីក្នុងតំបន់បាន ថ្លែងប្រាប់ក្រុមអ្នកសារព័ត៌មានក្នុងស្រុក របស់អ៊ុយក្រែន ថាមនុស្សយ៉ាងហោចណាស់១៧នាក់ បានទទួលរងរបួស ទាំងអ្នកជំងឺនិងបុគ្គលិកពេទ្យ ប៉ុន្តែមិនបានបញ្ជាក់ថា
មានអ្នកបាត់បង់ជីវិតឡើយ៕
ប្រែសម្រួល៖ស៊ុនលី
