បរទេស៖ យោងតាមការចេញផ្សាយរបស់ RT.com កាលពីថ្ងៃម្សិលមិញនេះ បានឲ្យដឹងថា ទូតហ្វីលីពីន បានបង្ហាញពីបំណងចង់ស្វាគមន៍ កងកម្លាំងយោធាអាមេរិក នៅក្នុងប្រទេសរបស់ខ្លួន ប្រសិនបើ វិបត្តិនៅអ៊ុយក្រែន នឹងបន្តកើនឡើង ទៅជាសង្គ្រាមដ៏មានកំដៅ ហើយរីករាលដាល ទៅជាជម្លោះរវាង អាមេរិកនិងរុស្សី។
មេដឹកនាំហ្វីលីពីន លោកប្រធានាធិបតី Rodrigo Duterte បានសម្រេចជ្រើសយក ខាងអាមេរិក នៅក្នុងសង្គ្រាមរវាងអាមេរិកនិងរុស្សី ជុំវិញបញ្ហាវិបត្តិ នៅអ៊ុយក្រែន ដោយសន្យាថានឹង ទទួលស្វាគមន៍ កងកម្លាំងយោធាអាមេរិក ក្នុងករណីបើសង្គ្រាមនេះ នឹងរីករាលដាល មកដល់តំបន់អាស៊ី។
លោក Duterte បានបញ្ជាក់ថាគឺត្រៀមខ្លួនរួចរាល់ ទៅហើយក្នុងការបើកទីតាំង មូលដ្ឋានទៅតាមការស្នើសុំ របស់អាមេរិកនេះបើយោងតាមការបញ្ជាក់ ដោយលោក Manuel Romualdez ទូតហ្វីលពីន ប្រចាំនៅទីក្រុង វ៉ាស៊ិនតោន។
លោក Romualdez បានបញ្ជាក់យ៉ាងដូច្នេះថា៖ លោក Duterte បានបញ្ជាក់ថាប្រសិនបើពួកគេ ស្នើសុំដើម្បីគាំទ្រហ្វីលីពីននោះ អ្វីៗគឺបានត្រៀមរួចរាល់ហើយ។ ហ្វីលីពីន នឹងរួចរាល់នៅក្នុងកិច្ចខិតខំប្រឹងប្រែង មួយនេះជាពិសេស ប្រសិនបើវិបត្តិអ៊ុយក្រែន នឹងរីករាលដាលមកដល់តំបន់អាស៊ី ហើយអាមេរិកអាចបង្កើត ទីតាំងមូលដ្ឋានថ្មី និងប្រើប្រាស់មូលដ្ឋានចាស់ នៅក្នុងប្រទេសហ្វីលីពីន បានគ្រប់ពេលប្រសិនបើចាំបាច់៕
ប្រែសម្រួល៖ស៊ុនលី
