បរទេស៖ ប្រទេសចិន តាមសេចក្តីរាយការណ៍ បានចរចាលើកិច្ចព្រមព្រៀង សន្តិសុខសម្ងាត់ ជាមួយកោះ Solomon ដោយបង្កើតការព្រមានអំពីគ្រោះថ្នាក់ ដល់សហរដ្ឋអាមេរិក និងអូស្ត្រាលី ដោយសារតែសក្តានុពល សម្រាប់រដ្ឋាភិបាលទីក្រុងប៉េកាំង ទទួលបានទីតាំងការពារ នៅតំបន់ឆ្នេរប៉ាស៊ីហ្វិកខាងត្បូង ដែលវាអាចរារាំង ចរាចរណ៍ដឹកជញ្ជូន។
យោងតាមសារព័ត៌មាន RT ចេញផ្សាយកាលពីថ្ងៃទី២៥ ខែមីនា ឆ្នាំ២០២២ បានឱ្យដឹងថា កាសែត New York Times បានរាយការណ៍កាលពីថ្ងៃសុក្រ ដោយលើកឡើង ពីឯកសារដែលបែកធ្លាយ ដោយគូប្រជែង នៃកិច្ចព្រមព្រៀងនេះថា មន្ត្រីចិននិងកោះ Solomon ជិតនឹងចុះហត្ថលេខា លើកិច្ចព្រមព្រៀងសម្ងាត់នេះ ហើយប្រសិនបើកិច្ចព្រមព្រៀងនេះ បានបញ្ចប់ កតិកាសញ្ញានេះ នឹងផ្តល់ឱ្យនាយករដ្ឋមន្ត្រីកោះ Solomon Islands Manasseh Sogavare នូវលទ្ធភាពក្នុងការអំពាវនាវឱ្យប្រទេសចិន ឱ្យមានការការពារ ដូចជានៅក្នុងករណី នៃចលាចលស៊ីវិលជាដើម។
រដ្ឋាភិបាលទីក្រុងប៉េកាំង នឹងត្រូវបានផ្តល់សិទ្ធិ ឱ្យចូលចតនាវាចម្បាំង និងចូលទៅកាន់ “មធ្យោបាយចាំបាច់ទាំងអស់” នៅលើកោះនេះ។
ក្រសួងការបរទេសអូស្ត្រាលី បានបញ្ជាក់ពីភាពត្រឹមត្រូវ នៃសេចក្តីព្រាងកិច្ចព្រមព្រៀងសន្តិសុខ ហើយបានអះអាងថា “គ្រួសារប៉ាស៊ីហ្វិក” របស់ខ្លួនគឺសមបំផុត ក្នុងការផ្តល់ជំនួយសន្តិសុខ ដល់កោះ Solomon ។ វាបានកត់សម្គាល់ថា អូស្ត្រាលីបានមកជួយប្រទេសនេះ នាពេលកន្លងមក ដូចជានៅពេលដែលវាបានធ្វើឱ្យ សកម្មសន្ធិសញ្ញា សន្តិសុខឆ្នាំ 2017 ជាមួយកោះ Solomon ដើម្បីជួយស្ដារសណ្តាប់ធ្នាប់ ក្នុងអំឡុងពេលកុបកម្ម កាលពីខែវិច្ឆិកាឆ្នាំមុន៕
ប្រែសម្រួលៈ ណៃ តុលា
