គៀវ៖ ប្រមុខចារកម្មយោធាអ៊ុយក្រែន ឲ្យដឹងថា ប្រធានាធិបតី រុស្ស៊ីលោក វ្ល៉ាឌីមៀ ពូទីន អាចនឹងសម្លឹងមើលពីការបំបែកអ៊ុយក្រែន ជាពីរដូចកូរ៉េខាងជើង និងកូរ៉េខាងត្បូង អញ្ចឹងដែរនេះបើយោងតាមការចុះផ្សាយ របស់ទីភ្នាក់ងារសារព័ត៌មាន CNN។
កងពលតូច ឧត្តមសេនីយ៍ លោក Kyrylo Budanov ប្រធានទីភ្នាក់ងារស៊ើបការណ៍សម្ងាត់ការពារជាតិអ៊ុយក្រែនបានឲ្យដឹងថា ប្រតិបត្តិការរបស់រុស្ស៊ីនៅជុំវិញទីក្រុងគៀវ បានបរាជ័យ ហើយឥឡូវនេះវាមិនអាចទៅរួចទេ សម្រាប់កងទ័ពរុស្ស៊ីក្នុងការផ្តួលរំលំរដ្ឋាភិបាលអ៊ុយក្រែន។ លោកបានលើកឡើងថា សង្គ្រាមរបស់លោក ពូទីន ឥឡូវនេះ គឺ ផ្តោតលើភាគខាងត្បូង និងភាគខាងកើតនៃប្រទេសអ៊ុយក្រែន។
លោកបន្ដថា “មានហេតុផល ដើម្បីជឿថា លោកកំពុងពិចារណាសេណារីយ៉ូ “កូរ៉េ” សម្រាប់អ៊ុយក្រែន នោះគឺកងកម្លាំងរុស្ស៊ី នឹងព្យាយាមដាក់ខ្សែបន្ទាត់បែងចែករវាងតំបន់ ដែលមិនបានកាន់កាប់ និងកាន់កាប់នៃប្រទេសរបស់យើង។ តាមពិតវាជាការប៉ុនប៉ង បង្កើតកូរ៉េខាងជើង និងខាងត្បូង នៅអ៊ុយក្រែន”។
លោក Budanov បានលើកឡើងថា រុស្ស៊ីនៅតែមានចេតនាបង្កើតច្រករបៀងលើដីពីព្រំដែនរុស្ស៊ីទៅកាន់តំបន់គ្រីមេ ហើយបានឲ្យដឹងថា លោករំពឹងថានឹងឃើញការប៉ុនប៉ង ដើម្បីបង្រួបបង្រួមទឹកដីដែលកាន់កាប់ដោយរុស្ស៊ី ទៅជាអង្គភាពតែមួយ។
លោក Budanov បានបន្ថែមថា “យើងកំពុងមើលឃើញការប៉ុនប៉ង ដើម្បីបង្កើត” ប៉ារ៉ាឡែល “អាជ្ញាធរនៅក្នុងទឹកដីដែលកាន់កាប់ និងបង្ខំមនុស្សឱ្យបោះបង់រូបិយប័ណ្ណអ៊ុយក្រែន” ដោយបន្ថែមថា លោករំពឹងថាប្រជាជនអ៊ុយក្រែន នឹងទប់ទល់នឹងកិច្ចខិតខំប្រឹងប្រែងនយោបាយរបស់រុស្ស៊ី៕
ប្រែសម្រួល ឈូក បូរ៉ា
