គៀវ៖ ប្រធានាធិបតីអ៊ុយក្រែនលោក Volodymyr Zelensky បានឲ្យដឹងនៅក្នុងសុន្ទរកថា វីដេអូមួយកាលពីថ្ងៃចន្ទថា កងកម្លាំងរុស្ស៊ីបានចាប់ផ្តើមសមរភូមិសម្រាប់តំបន់ ដុនបាស ប៉ុន្តែអ៊ុយក្រែន នឹងការពារខ្លួនជាប់ជានិច្ច។
ទីភ្នាក់ងារព័ត៌មានរដ្ឋ Ukrinform បានដកស្រង់សម្ដីលោកប្រធានាធិបតីថា “ឥឡូវនេះយើងអាចនិយាយបានថា កងទ័ពរុស្ស៊ីបានចាប់ផ្តើមសមរភូមិដុនបាស ដែលពួកគេបានរៀបចំជាយូរមកហើយ។ មួយផ្នែកធំនៃកងទ័ពរុស្ស៊ី ទាំងមូលឥឡូវនេះកំពុងផ្តោតលើការវាយលុកនេះ”។
លោកបានបន្ថែមថា”មិនថាទាហានរុស្ស៊ីប៉ុន្មាននាក់ត្រូវបានជំរុញទៅទីនោះទេ យើងនឹងប្រយុទ្ធ” នេះបើយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ។
លោក Zelensky បានលើកឡើងថា នៅភាគខាងកើត និងខាងត្បូងនៃអ៊ុយក្រែន ថ្មីៗនេះ កងកម្លាំងរុស្ស៊ីបានព្យាយាមវាយប្រហារដោយចេតនាជាងពេលមុនបន្តិច ហើយស្វែងរកចំណុចខ្សោយក្នុងវិស័យការពាររបស់ប្រទេស ដើម្បីទៅទីនោះជាមួយកងកម្លាំងសំខាន់ៗ៕
ប្រែសម្រួល ឈូក បូរ៉ា
