បរទេស ៖ ប៉ង់តាហ្គោន កាលពីថ្ងៃអង្គារម្សិលមិញនេះ បានបញ្ជាក់ថា សម្ព័ន្ធមិត្តរបស់សហរដ្ឋអាមេរិក បានចាប់ផ្តើមជួយគាំទ្រ បន្ថែមទៀត ទៅលើកងកម្លាំង យន្តហោះ ប្រយុទ្ធរបស់ប្រទេសអ៊ុយក្រែន តាមរយៈការផ្តល់ ជាសំភារៈនិងគ្រឿងបន្លាស់ យន្តហោះសំខាន់ ដែលអាចយកទៅធ្វើការ ជួសជុលយន្តហោះចាស់ៗ របស់អ៊ុយក្រែន ឲ្យអាចដំណើរការឡើងវិញ និងប្រយុទ្ធជាមួយនឹងរុស្សី ខណៈដែលកំដៅកំពុង កើតឡើង រវាងគ្នានៅក្នុងតំបន់ Donbass ។
អ្នកនាំពាក្យ របស់មន្ទីរប៉ង់តាហ្គោន លោក John Kirby ដែលបានថ្លែង ប្រាប់ទៅកាន់ក្រុមអ្នកកាសែត កាលពីថ្ងៃអង្គារម្សិលមិញនេះដែរ បានបញ្ជាក់ថា ៖ទោះបីជាអាមេរិក មិនអាចផ្តល់អាវុធចាស់ៗ ដែលសេសសល់ពី សម័យសហភាពសូវៀត ទៅឲ្យអ៊ុយក្រែន តាមការ ចង់បានក៏ពិតមែន ប៉ុន្តែបណ្តាប្រទេសផ្សេងទៀត កំពុងខិតខំក្នុងការរៀបចំ ស្តុកអាវុធទាំងនោះនិង បញ្ជូនវាទៅឲ្យអ៊ុយក្រែន ដែលភាគច្រើនលើកនេះ គឺជាគ្រឿងបន្លាស់នៃយន្តហោះចម្បាំង ។
លោក Kirby បានថ្លែងបែបនេះថា ពួកគេបានទទួលជំនួយទាំងនោះហើយ និងកំពុងធ្វើការជួសជុលយន្តហោះជាច្រើន ដើម្បីឲ្យអាចដំណើរ ការបានឡើងវិញ ដែលមានន័យថានៅពេលនេះអ៊ុយក្រែន មានសមត្ថភាពយន្តហោះចម្បាំង ល្អប្រសើរជាជាង
កាលពី២សប្តាហ៍មុន ។
ទោះបីជាយ៉ាងណាក្តីលោក Kirby រូបនេះមិនបានបញ្ជាក់ទេថា តើប្រទេសណាខ្លះ ដែលបានចូលរួមនៅក្នុងកិច្ចការងារ ផ្គត់ផ្គង់គ្រឿងបន្លាស់ទាំងនេះ ឬក៏បានបញ្ជាក់អំពីចំនួន ពិតប្រាកដនោះដែរ ៕
ប្រែសម្រួល៖ស៊ុនលី
