IMF កាត់បន្ថយការព្យាករណ៍ កំណើនសេដ្ឋកិច្ចពិភពលោក មកត្រឹម ៣,៦ភាគរយ

វ៉ាស៊ីនតោន៖ មូលនិធិរូបិយវត្ថុអន្តរជាតិ (IMF) បានកាត់បន្ថយការព្យាករណ៍កំណើនសកលសម្រាប់ឆ្នាំ២០២២ មកត្រឹម ៣,៦ ភាគរយចំពេលមានជម្លោះរុស្ស៊ី និងអ៊ុយក្រែន ដោយព្រមានថាអតិផរណាបានក្លាយទៅជា “គ្រោះថ្នាក់ច្បាស់លាស់ និងបច្ចុប្បន្ន” សម្រាប់ប្រទេសជាច្រើន។

IMF បានកត់សម្គាល់ថាហានិភ័យកំពុងកើនឡើងដែលការរំពឹងទុកអតិផរណារសាត់ឆ្ងាយពីគោលដៅអតិផរណារបស់ធនាគារកណ្តាល ដែលជំរុញឱ្យមានការរឹតបន្តឹងកាន់តែខ្លាំង ដោយបន្ថែមថា ហានិភ័យនៃភាពផុយស្រួយផ្នែកហិរញ្ញវត្ថុ កំពុងបង្កើនការរំពឹងទុកនៃការរឹតបន្តឹងយ៉ាងខ្លាំងនៃលក្ខខណ្ឌហិរញ្ញវត្ថុសកល ក៏ដូចជាលំហូរចេញមូលធន។

IMF បានឲ្យដឹងនៅក្នុងរបាយការណ៍ចុងក្រោយបង្អស់របស់ខ្លួនអំពីទស្សនវិស័យសេដ្ឋកិច្ចពិភពលោក (WEO) ដោយកត់សម្គាល់ថា ទស្សនវិស័យសេដ្ឋកិច្ចពិភពលោកកាន់តែអាក្រក់ទៅៗ វិបត្តិអ៊ុយក្រែនបានលាតត្រដាង ខណៈពេលដែលសេដ្ឋកិច្ចពិភពលោក កំពុងស្ថិតនៅលើផ្លូវកែតម្រូវ ប៉ុន្តែមិនទាន់បានជាសះស្បើយពេញលេញពីជំងឺរាតត្បាតកូវីដ-១៩ នៅឡើយ។

ប្រធាន IMF លោក Pierre-Olivier Gourinchas បានប្រាប់សន្និសីទសារព័ត៌មានក្នុងអំឡុងកិច្ចប្រជុំនិទាឃរដូវឆ្នាំ២០២២ របស់ IMF និងធនាគារពិភពលោកថា “ក្នុងរយៈពេលប៉ុន្មានសប្តាហ៍នេះ ពិភពលោកបានជួបប្រទះនូវការភ្ញាក់ផ្អើលដ៏ធំមួយម្តងទៀត” ។

លោក Gourinchas បានលើកឡើងថា “លើសពីផលប៉ះពាល់មនុស្សធម៌ភ្លាមៗ និងសោកនាដកម្មរបស់វា សង្រ្គាមនឹងធ្វើឱ្យកំណើនសេដ្ឋកិច្ចថយចុះ និងបង្កើនអតិផរណា ហានិភ័យសេដ្ឋកិច្ចជារួមបានកើនឡើងយ៉ាងខ្លាំង ហើយការដោះដូរគោលនយោបាយកាន់តែមានការប្រកួតប្រជែង”៕ប្រែសម្រួល ឈូក បូរ៉ា