យូអិន៖ អគ្គលេខាធិការរងអង្គការសហប្រជាជាតិលោកស្រី Amina Mohammed បានឲ្យដឹងថា ជាមួយនឹងសេដ្ឋកិច្ចពិភពលោកស្ថិតនៅក្រោមភាពតានតឹងខ្លាំង គោលដៅអភិវឌ្ឍន៍ប្រកបដោយចីរភាព (SDGs) ត្រូវការការសង្គ្រោះជាបន្ទាន់។
លោកស្រីបានលើកឡើងថា “សេដ្ឋកិច្ចពិភពលោកស្ថិតនៅក្រោមភាពតានតឹងខ្លាំង ប្រទេសកំពុងអភិវឌ្ឍន៍ជាច្រើនកំពុងងើបឡើងវិញពីផលប៉ះពាល់នៃការស្តារឡើងវិញមិនស្មើគ្នាពីជំងឺរាតត្បាតកូវីដ-១៩ និងការអូសបន្លាយពេលវេលានៃវិបត្តិអាកាសធាតុ វិសមភាពវ៉ាក់សាំងនៅតែបន្ត។
លោកស្រីបានឲ្យដឹងដោយនិយាយក្នុងនាមអគ្គលេខាធិការអង្គការសហប្រជាជាតិលោក Antonio Guterres ក្នុងពិធីបើកវេទិកាហិរញ្ញវត្ថុសម្រាប់ការអភិវឌ្ឍន៍ថា “សង្រ្គាមនៅអ៊ុយក្រែនឥឡូវនេះ កំពុងធ្វើឱ្យមានការភ្ញាក់ផ្អើលយ៉ាងខ្លាំង តាមរយៈទីផ្សារអាហារ ថាមពល និងហិរញ្ញវត្ថុពិភពលោក”។
លោកស្រីបន្ដថា សេដ្ឋកិច្ចជាច្រើនស្ថិតក្នុងដំណាក់កាលធ្លាក់ចុះនៃការក្ស័យធន ការកាត់បន្ថយការវិនិយោគសំខាន់ៗ ការធ្លាក់ចុះសេដ្ឋកិច្ច និងការកើនឡើងភាពអត់ការងារធ្វើ។ វឌ្ឍនភាពនៃការអភិវឌ្ឍន៍ជាច្រើនទសវត្សរ៍កំពុងត្រូវបានលុបចោល។
ធនាគារពិភពលោកព្យាករណ៍ថា មួយភាគបួននៃប្រជាជនមួយពាន់លាននាក់ អាចនឹងត្រូវបានរុញចូលទៅក្នុងភាពក្រីក្រខ្លាំងនៅឆ្នាំនេះ។ មនុស្សរហូតដល់ ៣២៣លាននាក់អាចប្រឈមមុខនឹងអសន្តិសុខស្បៀងធ្ងន់ធ្ងរ។ លោកស្រីបានបន្ថែមថា ហើយការផ្លាស់ប្តូរដ៏សំខាន់ទៅកាន់ថាមពលស្អាត និងនិរន្តរភាព គឺមានហានិភ័យដ៏ធំសម្បើម។
លោកស្រីបន្ថែមទៀតថា “មានសញ្ញាដំបូងនៃរលកយក្សស៊ូណាមិនៃវិបត្តិបំណុល ដែលអាចកើតមាន ការដកហូត ការមិនសប្បាយចិត្ត និងចលាចលស៊ីវិល។ គ្មានប្រទេសអភិវឌ្ឍន៍ ឬកំពុងអភិវឌ្ឍណាមួយនឹងត្រូវបានឯកោពីផលប៉ះពាល់សេដ្ឋកិច្ចសង្គមនោះទេ។”
លោកស្រីបានបញ្ជាក់បន្ថែមថា SDGs ត្រូវការការសង្គ្រោះបន្ទាន់។ ការផ្តល់ហិរញ្ញប្បទានសម្រាប់ការអភិវឌ្ឍន៍ គឺជាផ្នែកសំខាន់មួយនៃដំណោះស្រាយ៕
ប្រែសម្រួល ឈូក បូរ៉ា
