គៀវ៖ អ៊ុយក្រែន បានចោទប្រកាន់រុស្ស៊ី កាលពីថ្ងៃព្រហស្បតិ៍ ពីបទលួចគ្រាប់ធញ្ញជាតិ នៅក្នុងទឹកដីដែលខ្លួនបានកាន់កាប់ ដែលជាទង្វើមួយដែលខ្លួន បានលើកឡើងថា បានបង្កើនការគំរាមកំហែង ដល់សន្តិសុខស្បៀងអាហារពិភពលោក ដែលបង្កឡើងដោយការរំខាន ដល់ការសាបព្រួសនិទាឃរដូវ និងការបិទច្រករបស់អ៊ុយក្រែន ក្នុងអំឡុងពេលសង្រ្គាម។
នៅពេលសួរអំពីការចោទប្រកាន់នេះ វិមានក្រឹមឡាំងបានឲ្យដឹងថា ខ្លួនមិនមានព័ត៌មានអំពីបញ្ហានេះទេ នេះបើយោងតាមការចុះផ្សាយ របស់ទីភ្នាក់ងារសារព័ត៌មានសិង្ហបុរី។
ក្រសួងការបរទេសអ៊ុយក្រែន បានឲ្យដឹងនៅក្នុងសេចក្តីថ្លែងការណ៍ ជាលាយលក្ខណ៍អក្សរថា ខ្លួន “ថ្កោលទោសយ៉ាងដាច់អហង្ការ ចំពោះសកម្មភាពឧក្រិដ្ឋកម្ម របស់សហព័ន្ធរុស្ស៊ី នៅក្នុងអ្វីដែលហៅថាការដកហូត ដំណាំពីកសិករនៅក្នុងតំបន់ Kherson” នៃតំបន់ភាគខាងត្បូងអ៊ុយក្រែន។
អ៊ុយក្រែនមិនបានផ្តល់ព័ត៌មាន លម្អិតបន្ថែមអំពីការលួច គ្រាប់ធញ្ញជាតិនៅក្នុងតំបន់ Kherson ដែលទីក្រុងសំខាន់របស់ខ្លួន ត្រូវបានកាន់កាប់ដោយ កងកម្លាំងរុស្ស៊ីចាប់តាំងពីថ្ងៃដំបូង នៃការលុកលុយរបស់រុស្ស៊ីនៅថ្ងៃទី២៤ ខែកុម្ភៈ។
ប្រភពបានឲ្យដឹងថា “ការលួចយកគ្រាប់ធញ្ញជាតិពីតំបន់ Kherson ក៏ដូចជាការទប់ស្កាត់ការដឹកជញ្ជូន ពីកំពង់ផែអ៊ុយក្រែន និងការជីកយករ៉ែនៃផ្លូវដឹកជញ្ជូន គំរាមកំហែងដល់សន្តិសុខ ស្បៀងរបស់ពិភពលោក” ។
ភាគីអ៊ុយក្រែនបានបញ្ជាក់ថា “យើងទាមទារឱ្យរុស្ស៊ីបញ្ឈប់ ការលួចគ្រាប់ធញ្ញជាតិខុសច្បាប់ បិទច្រករបស់អ៊ុយក្រែន ស្តារសេរីភាពនៃការធ្វើនាវាចរណ៍ និងអនុញ្ញាតឱ្យឆ្លងកាត់នាវាឈ្មួញ”៕
ប្រែសម្រួល ឈូក បូរ៉ា
