តូក្យូ៖ នាយករដ្ឋមន្ត្រីជប៉ុនលោក Fumio Kishida នឹងជួបនៅទីក្រុងតូក្យូជាមួយ ប្រធានគណៈកម្មការអឺរ៉ុបលោកស្រី Ursula von der Leyen និងប្រធានក្រុមប្រឹក្សាអឺរ៉ុបលោក Charles Michel នៅថ្ងៃព្រហស្បតិ៍សប្តាហ៍ក្រោយ ដោយសង្គ្រាមរបស់រុស្ស៊ីប្រឆាំងនឹងអ៊ុយក្រែន និងការអះអាងរបស់ចិន នៅក្នុងតំបន់ឥណ្ឌូប៉ាស៊ីហ្វិក រំពឹងថានឹងត្រូវបានពិភាក្សា។
សហភាពអឺរ៉ុប បានឲ្យដឹងកាលពីថ្ងៃព្រហស្បតិ៍ថា កិច្ចប្រជុំកំពូលនឹងផ្តល់ “ឱកាសមួយ ដើម្បីបង្ហាញពីសម្ព័ន្ធភាពកាន់តែស៊ីជម្រៅ និងថាមវន្ត” រវាងប្លុកក្នុងតំបន់ និងប្រទេសជប៉ុន ដែលមានតម្លៃស្រដៀងគ្នា រួមទាំងការប្តេជ្ញាចិត្តដើម្បីការពារសណ្តាប់ធ្នាប់ អន្តរជាតិដោយផ្អែកលើច្បាប់។
វានឹងក្លាយជាដំណើរទស្សនកិច្ច លើកដំបូងរបស់ប្រមុខសហភាពអឺរ៉ុប ទាំងពីរទៅកាន់ប្រទេសជប៉ុន ចាប់តាំងពីអ្នកទាំងពីរ បានចូលកាន់តំណែងក្នុងខែធ្នូ ឆ្នាំ២០១៩។
អឺរ៉ុបបានឲ្យដឹងថា អ្នកទាំងពីរខាងលើ និងលោក Kishida នឹងពិភាក្សាអំពីកិច្ចសហប្រតិបត្តិការ និងការតម្រឹមបន្ថែមទៀតលើការ ដាក់ទណ្ឌកម្មប្រឆាំងនឹងប្រទេសរុស្ស៊ី និងមធ្យោបាយជាក់ស្តែង ក្នុងការផ្តល់ជំនួយផ្នែកមនុស្សធម៌ នយោបាយ ហិរញ្ញវត្ថុ និងសម្ភារៈដល់អ៊ុយក្រែន។
ពួកគេក៏ត្រូវបានគេរំពឹងថា នឹងនិយាយអំពីការអះអាង ក្នុងតំបន់ដែលកំពុងកើនឡើងរបស់ប្រទេសចិន និងបញ្ជាក់ពីសារៈសំខាន់នៃសន្តិភាព និងស្ថិរភាពនៅក្នុងច្រកសមុទ្រតៃវ៉ាន់។
ទីក្រុងប៉េកាំង បានចាត់ទុកកោះប្រជាធិបតេយ្យ ដែលគ្រប់គ្រងដោយខ្លួនឯងថា ជាខេត្តដែលបោះបង់ចោល ដើម្បីបង្រួបបង្រួមជាមួយដីគោកឡើងវិញ ដោយបង្ខំប្រសិនបើចាំបាច់។
ប្រធានបទរបៀបវារៈ ក៏នឹងរួមបញ្ចូលការពង្រឹងកិច្ចសហប្រតិបត្តិការ លើការប្រែប្រួលអាកាសធាតុ និងភាពជាដៃគូឌីជីថល ក៏ដូចជាការដកការរឹតបន្តឹង ការធ្វើដំណើរដែលត្រូវបានអនុវត្ត ដើម្បីឆ្លើយតបទៅនឹងជំងឺរាតត្បាតកូវីដ-១៩ ៕
ប្រែសម្រួល ឈូក បូរ៉ា
