ប៉េកាំង៖ ប្រទេសចិន និងរុស្ស៊ី បានសន្យាពង្រឹងកិច្ចសហប្រតិបត្តិការ នៅតាមដងទន្លេ Yangtze និង Volga នៅក្នុងកិច្ចប្រជុំនិម្មិត របស់ប្រធានក្រុមប្រឹក្សា សហប្រតិបត្តិការរវាងតំបន់ខាងលើ និងភាគកណ្តាលនៃទន្លេ Yangtze និងស្រុក Volga Federal District ដែលបានធ្វើឡើងកាលពីថ្ងៃអង្គារ។
ទីប្រឹក្សារដ្ឋចិន Wang Yong និង Igor Komarov បេសកជនពេញសមត្ថភាព របស់ប្រធានាធិបតីរុស្ស៊ីប្រចាំតំបន់ Volga Federal ទាំងពីរបានឲ្យដឹងជាវិជ្ជមាន អំពីវឌ្ឍនភាពថ្មីក្រោមយន្តការ “Yangtze-Volga” ។
អ្នកទាំងពីរបានយល់ព្រមលើកកម្ពស់ យន្តការក្រុមប្រឹក្សា ដើម្បីរួមចំណែកថ្មី ក្នុងការធ្វើឱ្យស៊ីជម្រៅភាពជាដៃគូយុទ្ធសាស្ត្រ ទូលំទូលាយនៃការសម្របសម្រួល សម្រាប់យុគសម័យថ្មី និងពង្រឹងទំនាក់ទំនងមិត្តភាព រវាងប្រជាជនទាំងពីរ។
លោក Wang បានស្នើថា តំបន់ទាំងពីរទាញយកសក្តានុពល សម្រាប់កិច្ចសហប្រតិបត្តិការ បង្កើនអត្ថន័យនៃការផ្លាស់ប្តូរវប្បធម៌ និងប្រជាជន និងបន្តបង្រួបបង្រួម និងលើកកំពស់កម្រិត នៃកិច្ចសហប្រតិបត្តិការ ក្រោមកាលៈទេសៈថ្មី។
សម្រាប់ផ្នែករបស់លោកវិញ លោក Komarov បានឲ្យដឹងថា រុស្ស៊ី ត្រៀមខ្លួនជាស្រេច ក្នុងការធ្វើការជាមួយប្រទេសចិន ដើម្បីពង្រីក និងស៊ីជម្រៅកិច្ចសហប្រតិបត្តិការ និងការផ្លាស់ប្តូរ ដើម្បីនាំយកកិច្ចសហប្រតិបត្តិការទ្វេភាគី ទៅកាន់កម្រិតថ្មីមួយ៕ ប្រែសម្រួល ឈូក បូរ៉ា
