តេអេរ៉ង់៖ ទូរទស្សន៍ Press TV របស់អ៊ីរ៉ង់បានរាយការណ៍កាលពីថ្ងៃអង្គារថា ប្រទេសអ៊ីរ៉ង់ បានជំរុញឱ្យទីភ្នាក់ងារថាមពល អាតូមិកអន្តរជាតិ (IAEA) ជៀសវាងបញ្ហា “នយោបាយ” ទាក់ទងនឹងកម្មវិធីនុយក្លេអ៊ែររបស់អ៊ីរ៉ង់។
លោក Kazem Gharibabadi អនុប្រធានតុលាការអ៊ីរ៉ង់ និងជាអតីតបេសកជនរបស់ IAEA ត្រូវបានដកស្រង់សម្តី ដោយសារព័ត៌មាន Press TV ដោយលើកឡើងថា អ៊ីរ៉ង់បានសហការ ជាមួយទីភ្នាក់ងារនេះ “ដោយស្មោះត្រង់ និងប្រកបដោយតម្លាភាព” ហើយបានផ្តល់ “ការពន្យល់គ្រប់គ្រាន់” ដល់សំណួរពី IAEA ។
លោកបានឆ្លើយតបទៅនឹងរបាយការណ៍របស់ IAEA ដែលបានចេញផ្សាយកាលពីសប្តាហ៍មុន ដែលបានអះអាងថា សម្ភារៈនុយក្លេអ៊ែរ “មិនទាន់ប្រកាស” ត្រូវបានរកឃើញ នៅក្នុងទីតាំងអ៊ីរ៉ង់ចំនួនបី នៅតែមិនទាន់មានចម្លើយនៅឡើយ។
លោក Gharibabadi បានលើកឡើងថា ហេតុផលមួយដែលធ្វើឱ្យ IAEA ពង្រីកបញ្ហានេះ ហើយដាក់វាឱ្យខ្ពស់ក្នុងរបៀបវារៈរបស់ខ្លួនគឺ “សម្ពាធនយោបាយ ដែលសហរដ្ឋអាមេរិក និងប្រទេសលោកខាងលិចមួយចំនួន បាននិងកំពុងដាក់សម្ពាធ លើទីភ្នាក់ងារនេះ”។
លោកបានរំលឹកឡើងវិញ នូវការប្រឆាំងរបស់អ៊ីរ៉ង់ ចំពោះដំណោះស្រាយប្រឆាំង នឹងអ៊ីរ៉ង់ណាមួយ នៅក្នុងកិច្ចប្រជុំក្រុមប្រឹក្សាភិបាលរបស់ IAEA ដែលជិតមកដល់ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោកបានបន្ថែមថា “ខ្ញុំសង្ឃឹមថាបណ្តាប្រទេសលោកខាងលិច និងសហរដ្ឋអាមេរិក នឹងយល់ឃើញរបស់ពួកគេ ហើយជ្រើសរើស មិនដាក់ដំណោះស្រាយជាផ្លូវការនោះទេ ពីព្រោះពួកគេដឹងថា វិធានការនេះនឹងធ្វើឱ្យស្ថានការណ៍ កាន់តែស្មុគស្មាញ”៕ ប្រែសម្រួល ឈូក បូរ៉ា
