ប្រមុខការពារជាតិចិន និងអាមេរិក យល់ព្រមពង្រឹងទំនុកចិត្តគ្នា ទៅវិញទៅមក ជាយុទ្ធសាស្ត្រគ្រប់គ្រង ភាពខុសគ្នាឱ្យបានត្រឹមត្រូវ

សិង្ហបុរី៖ ទីប្រឹក្សារដ្ឋ និងជារដ្ឋមន្ត្រីការពារជាតិចិន លោក Wei Fenghe និងរដ្ឋមន្ត្រីក្រសួងការពារជាតិអាមេរិក លោក Lloyd Austin បានព្រមព្រៀងគ្នាកាលពីថ្ងៃសុក្រ ដើម្បីបង្កើនការជឿទុកចិត្តគ្នា ទៅវិញទៅមកជាយុទ្ធសាស្ត្រ និងគ្រប់គ្រងភាពខុសគ្នារវាងយោធា នៃប្រទេសទាំងពីរឱ្យបានត្រឹមត្រូវ។

ប្រមុខការពារជាតិទាំងពីរ ដែលបានជួបគ្នានៅទីនេះនៅខាងក្រៅកិច្ចសន្ទនា Shangri-La លើកទី១៩ នៅប្រទេសសិង្ហបុរី បានឯកភាពថា យោធាទាំងពីរគួរតែអនុវត្តការ ឯកភាពដ៏សំខាន់ដែល ប្រមុខរដ្ឋរបស់ពួកគេ រក្សាទំនាក់ទំនងជាយុទ្ធសាស្ត្រកម្រិតខ្ពស់ ហើយមិនគួរបង្វែរភាព ខុសគ្នាចូលទៅក្នុងជម្លោះ និងការប្រឈមមុខដាក់គ្នាឡើយ។

លោក Wei បានលើកឡើងថា បច្ចុប្បន្នសន្តិភាព និងការអភិវឌ្ឍន៍ ដែលជានិន្នាការមូលដ្ឋាន នៃសម័យកាលរបស់យើង កំពុងប្រឈមមុខនឹង បញ្ហាប្រឈមយ៉ាងធ្ងន់ធ្ងរ។

គំនិតផ្តួចផ្តើមអភិវឌ្ឍន៍សកល និងគំនិតផ្តួចផ្តើមសន្តិសុខសកល ដែលស្នើឡើងដោយប្រធានាធិបតីចិន ស៊ី ជីនពីង បានកំណត់ផ្លូវត្រឹមត្រូវសម្រាប់មនុស្សជាតិ ដើម្បីជំនះវិបត្តិ ហើយសន្តិភាព និងស្ថិរភាពនៅក្នុងតំបន់អាស៊ីប៉ាស៊ីហ្វិក ទាមទារកិច្ចខិតខំប្រឹងប្រែងរួមគ្នា របស់ប្រទេសក្នុងតំបន់។

លោកបានបន្ដថា ប្រទេសចិនសង្ឃឹមថា នឹងកសាងទំនាក់ទំនងប្រទេសដ៏សំខាន់មួយ ជាមួយសហរដ្ឋអាមេរិក ដែលបង្ហាញពីការអភិវឌ្ឍន៍ប្រកបដោយស្ថិរភាព និងជាទិសដៅនៃកិច្ចខិតខំប្រឹងប្រែង រួមគ្នារបស់ប្រទេសទាំងពីរ។

សហរដ្ឋអាមេរិក គួរតែមើលការអភិវឌ្ឍន៍ និងការរីកចម្រើនរបស់ចិនតាមរបៀបសមហេតុផល ហើយចៀសវាងការវាយប្រហារ លាបពណ៌ ទប់ស្កាត់ និងគាបសង្កត់ចិន។

លោក Wei បានបន្ថែមថា អាមេរិកមិនត្រូវជ្រៀតជ្រែកចូល កិច្ចការផ្ទៃក្នុងរបស់ចិន ឬប៉ះពាល់ដល់ផលប្រយោជន៍ របស់ប្រទេសចិនឡើយ ដោយលោក Wei បានលើកឡើងថា មានតែវិធីនេះទេ ទើបទំនាក់ទំនងរវាងចិន និងសហរដ្ឋអាមេរិកអាចដំណើរការ ឆ្ពោះទៅរកលទ្ធផលវិជ្ជមានបាន។

លោកបានគូសបញ្ជាក់ថា ទំនាក់ទំនងស្ថិរភាពរវាងយោធាទាំងពីរ មានសារៈសំខាន់ណាស់សម្រាប់ ការអភិវឌ្ឍទំនាក់ទំនងរវាងប្រទេសទាំងពីរ ដោយលោកបានបន្ថែមថា យោធាទាំងពីរគួរតែជៀសវាងជម្លោះ និងការប្រឈមមុខដាក់គ្នា ៕

ប្រែសម្រួល ឈូក បូរ៉ា