បរទេស៖ ប្រជាជនអាល្លឺម៉ង់គួរតែត្រៀមលក្ខណៈ សម្រាប់រដូវស្លឹកឈើជ្រុះ និងរដូវរងាដ៏លំបាក នៅពេលខាងមុខដោយសារតម្លៃឡើងខ្ពស់ ខណៈដែលប្រទេសនេះជំរុញ ឱ្យមានឯករាជ្យថាមពលពីប្រទេសរុស្ស៊ី។ នេះបើតាមអនុអធិការបតី និងជាប្រធានក្រសួងសេដ្ឋកិច្ច លោក Robert Habeck បានព្រមានកាលពីថ្ងៃសុក្រ។
យោងតាមសារព័ត៌មាន RT ចេញផ្សាយនៅថ្ងៃទី១១ ខែមិថុនា ឆ្នាំ២០២២ បានឱ្យដឹងដោយផ្អែកតាម ការលើកឡើងរបស់លោក Robert Habeck ដែលត្រូវបានដកស្រង់ដោយសារព័ត៌មាន RIA Novosti ថា «ចំពោះការគាំទ្រពីប្រជាជន ដែលត្រូវការ ខ្ញុំបានបញ្ជាក់យ៉ាងច្បាស់ថាអ្វី ដែលនៅខាងមុខយើង និងអ្វីដែលជាការពិតមួយផ្នែករួចទៅហើយ… យើងកំពុងប្រឈមមុខនឹង រដូវស្លឹកឈើជ្រុះដ៏លំបាក និងរដូវរងាដ៏លំបាកមួយ»។
លោក Habeck បានធ្វើការទស្សន៍ទាយ ខណៈដែលលោកបានបង្ហាញគំនិតផ្តួចផ្តើម សន្សំថាមពលថ្មីរបស់ក្រសួងសហព័ន្ធ សម្រាប់កិច្ចការសេដ្ឋកិច្ច និងសកម្មភាពអាកាសធាតុ (BMWK)។ ទីក្រុងប៊ែរឡាំងគ្រោងនឹងជំនួសធ្យូងថ្ម និងប្រេងរបស់រុស្ស៊ី នៅចុងឆ្នាំនេះ ហើយបញ្ឈប់ការនាំចូលឧស្ម័ន ពីរុស្ស៊ីនៅឆ្នាំ ២០២៤ ហើយកំពុងតស៊ូស្វែងរក ប្រភពថាមពលជំនួស។
យោងតាមអនុអធិការបតីអាល្លឺម៉ង់ គឺតម្លៃថាមពលគឺខ្ពស់ខ្លាំងណាស់ហើយ “មនុស្សជាច្រើននឹងទទួលបាន វិក័យប័ត្រតម្លៃខ្ពស់ជាងធម្មតា” នៅក្នុងរដូវកាល កំដៅនាពេលខាងមុខ៕
