តេអេរ៉ង់ ៖ ប្រធានសភា និង សមាជិកសភា របស់ប្រទេសអ៊ីរ៉ង់ បានថ្កោលទោស កាលពីថ្ងៃអាទិត្យ ចំពោះដំណោះស្រាយ ប្រឆាំង នឹងទីក្រុងតេអេរ៉ង់ដែលថ្មីៗនេះ បានអនុម័តដោយក្រុមប្រឹក្សាភិបាល នៃទីភ្នាក់ងារ ថាមពលបរមាណូអន្តរជាតិ (IAEA) នេះបើយោងតាមទីភ្នាក់ងារ សារព័ត៌មានផ្លូវការ IRNA ។
សេចក្តីថ្លែងការណ៍មួយ ដែលបានចុះហត្ថលេខា ដោយសមាជិកសភាចំនួន ២៦០ នៅក្នុងសម័យប្រជុំ បើកចំហមួយបានឲ្យដឹងថា តំណាងប្រជាជនអ៊ីរ៉ង់ នៅក្នុងសភាបានថ្កោលទោសទង្វើ “មានហេតុផលនយោបាយ” ដែលបណ្តាលមកពីការទាមទារ ហួសហេតុរបស់រដ្ឋ លោកខាងលិចមួយចំនួន។
ប្រភពបានសង្កត់ធ្ងន់ថា សាធារណរដ្ឋឥស្លាម ដូចដែលបានបង្ហាញនៅក្នុង របាយការណ៍របស់ IAEA គឺជាប្រទេស ដែលមានសុច្ឆន្ទៈ ដែលបានផ្តល់ឱ្យទីភ្នាក់ងារ នូវចំនួនច្រើនបំផុត នៃឱកាសសម្រាប់ការត្រួតពិនិត្យ និងការចូលទៅកាន់ទីតាំង នុយក្លេអ៊ែរអ៊ីរ៉ង់ នៅចន្លោះពេលផ្សេងៗគ្នា។
សេចក្តីថ្លែងការណ៍បានបន្ថែមថា “ជំនួសឱ្យការជួយដោះស្រាយការ ទាមទាររបស់បស្ចិមប្រទេសប្រឆាំង នឹងកម្មវិធីនុយក្លេអ៊ែរដោយសន្តិវិធីរបស់អ៊ីរ៉ង់ ការចូលប្រើដោយសេរី របស់ទីភ្នាក់ងារនេះ បានផ្តល់ការកើនឡើងនូវសំណួរថ្មីរបស់ខ្លួន ដែលបានធ្វើឱ្យមានការ សង្ស័យរបស់អ៊ីរ៉ង់ អំពីភាពចាំបាច់ នៃការបន្តកិច្ច សហប្រតិបត្តិការបែបនេះ” ។
អ៊ីរ៉ង់ក៏មានការសោកស្ដាយផងដែរ ដែលថា “អគ្គនាយក IAEA លោក Rafael Grossi និងទីភ្នាក់ងារ នេះបានបាត់បង់នូវកេរ្តិ៍ឈ្មោះ និងភាពត្រឹមត្រូវផ្នែកបច្ចេកទេស របស់ពួកគេយ៉ាងច្បាស់ បន្ទាប់ពីការអនុម័តដំណោះស្រាយនេះ” ៕
ប្រែសម្រួល ឈូក បូរ៉ា
