កូឡុំបូ៖ ការិយាល័យនាយករដ្ឋមន្ត្រីបានឲ្យដឹងថា ស្ថានភាពអាសន្នត្រូវបាន ប្រកាសនៅក្នុងប្រទេសស្រីលង្កា កាលពីថ្ងៃពុធ បន្ទាប់ពីប្រធានាធិបតីលោក Gotabaya Rajapaksa បានចាកចេញទៅកាន់ប្រទេសម៉ាល់ឌីវ ចំពេលមានវិបត្តិសេដ្ឋកិច្ចធ្ងន់ធ្ងរ ដែលបានបង្កឱ្យមានការតវ៉ាយ៉ាងធ្ងន់ធ្ងរ។
ការិយាល័យបានឲ្យដឹងថា ប៉ូលីសបានដាក់បម្រាមគោចរ នៅក្នុងខេត្តភាគខាងលិច រួមទាំងរដ្ឋធានីកូឡុំបូ ផងដែរ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ប្រព័ន្ធផ្សព្វផ្សាយប្រទេសម៉ាល់ឌីវ បានរាយការណ៍ថា យន្តហោះយោធាមួយគ្រឿងដឹកលោក Rajapaksa បានចុះចតនៅអាកាសយានដ្ឋានអន្តរជាតិ Velana នៅម៉ោងប្រហែល ៣ ទៀបភ្លឺ ម៉ោងក្នុងស្រុកថ្ងៃពុធ។
គួរបញ្ជាក់ថា លោកប្រធានាធិបតីស្រីលង្កា បានចាកចេញជាច្រើនម៉ោង មុនពេលលាលែងពីតំណែង ត្រូវបានគេរំពឹងថា នឹងត្រូវប្រកាស។ ប្រទេសស្រីលង្កា បានជួបបញ្ហាដោយការខ្វះខាតប្រេងឥន្ធនៈ ថ្នាំពេទ្យ អាហារ ឧស្ម័ន និងសម្ភារៈ ចាំបាច់ដទៃទៀត នៅឆ្នាំនេះ ដោយតម្លៃស្បៀងអាហារ បានកើនឡើងខ្ពស់ និងអតិផរណាឡើងដល់ កម្រិតខ្ពស់បំផុត ។
នាយករដ្ឋមន្ត្រី Ranil Wickremesinghe បានឲ្យដឹងកាលពីថ្ងៃទី៥ ខែកក្កដាថា ប្រទេសនេះ “ក្ស័យធន” ហើយថាវិបត្តិសេដ្ឋកិច្ចដែលកំពុងបន្ត គឺជាអ្វីដែលមិនអាចដោះស្រាយ បានក្នុងរយៈពេលដ៏ខ្លីបាននោះឡើយ ៕
ប្រែសម្រួល ឈូក បូរ៉ា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
