បរទេស៖ ប្រធានាធិបតីលីបង់ លោក Michel Aoun បានអំពាវនាវឱ្យសហរដ្ឋអាមេរិក ដំណើរការការសម្រុះសម្រួលរបស់ខ្លួន ក្នុងការចរចារកំណត់ព្រំដែនដោយប្រយោលរវាងលីបង់ និងអ៊ីស្រាអែល នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោក Aoun ត្រូវបានគេដកស្រង់សម្តីដែលបានឲ្យដឹងក្នុងសេចក្តីថ្លែងការណ៍ចេញផ្សាយដោយប្រធានាធិបតីប្រទេសលីបង់ថា “វាមិនអាចទទួលយកបានក្នុងការពន្យារពេលដំណើរការបោះបង្គោលព្រំដែនសមុទ្រភាគខាងត្បូងឡើយ”។
លោក Aoun បានសង្កត់ធ្ងន់លើតម្រូវការ ដើម្បីធ្វើឱ្យការសម្រុះសម្រួលរបស់អាមេរិក ដែលធ្វើឡើងដោយបេសកជនថាមពលអាមេរិក Amos Hochstein ដើម្បីឈានដល់ការសន្និដ្ឋានយ៉ាងរហ័ស ដែលលោកជឿជាក់ថានឹង “ធ្វើឱ្យប្រទេសលីបង់ ទទួលបានអត្ថប្រយោជន៍ពីប្រេង និងឧស្ម័ននៅក្នុងទឹករបស់ខ្លួន ខណៈពេលដែលរក្សាស្ថិរភាពនៅតាមព្រំដែនរបស់ខ្លួន”។
លោក Aoun បានធ្វើការកត់សម្គាល់ក្នុងជំនួបរបស់លោកជាមួយប្រធាន និងជានាយកប្រតិបត្តិនៃក្រុមការងារអាមេរិកប្រចាំប្រទេសលីបង់ Edward Gabriel ដើម្បីពិភាក្សាអំពីកិច្ចការនយោបាយ និងសេដ្ឋកិច្ចចុងក្រោយបង្អស់នៅក្នុងប្រទេស។
ប្រទេសលីបង់ និងអ៊ីស្រាអែល កំពុងជាប់គាំងនៅក្នុងជម្លោះព្រំដែនសមុទ្រដែលកាន់តែខ្លាំងឡើង បន្ទាប់ពីអ៊ីស្រាអែលបានបញ្ជូននាវាដែលដំណើរការដោយក្រុមហ៊ុន Energean ដែលជាក្រុមហ៊ុនផលិតប្រេង និងឧស្ម័នដែលមានមូលដ្ឋាននៅទីក្រុងឡុងដ៍ ទៅកាន់វាល Karish កាលពីថ្ងៃទី០៥ ខែមិថុនា។
បច្ចុប្បន្ន អាជ្ញាធរលីបង់ កំពុងស្វែងរកការស្តារឡើងវិញនូវកិច្ចចរចាដោយប្រយោលជាមួយអ៊ីស្រាអែល ស្តីពីការកំណត់ព្រំដែនសមុទ្រ ដែលត្រូវបានផ្អាក បន្ទាប់ពីលីបង់បានពង្រីកការទាមទាររបស់ខ្លួននៅក្នុងដែនទឹក ដើម្បីរួមបញ្ចូលយ៉ាងហោចណាស់ផ្នែកមួយនៃតំបន់ប្រេង Karish៕ប្រែសម្រួល ឈូក បូរ៉ា
