ម៉ូស្គូ៖ រុស្ស៊ី និងអ៊ុយក្រែន បានចុះហត្ថលេខាដាច់ដោយឡែកពីគ្នាក្នុងកិច្ចព្រមព្រៀងនៅទីក្រុងអ៊ីស្តង់ប៊ុល កាលពីថ្ងៃសុក្រជាមួយតួកគី និងអង្គការសហប្រជាជាតិ ដើម្បីបន្តការនាំចេញគ្រាប់ធញ្ញជាតិពីកំពង់ផែអ៊ុយក្រែនទៅកាន់ទីផ្សារអន្តរជាតិតាមរយៈសមុទ្រខ្មៅ។
កិច្ចព្រមព្រៀងដែលទន្ទឹងរង់ចាំជាយូរមកហើយ ដែលជាកិច្ចព្រមព្រៀងដ៏សំខាន់លើកដំបូងរវាងទីក្រុងមូស្គូ និងទីក្រុងគៀវ ចាប់តាំងពីប្រតិបត្តិការយោធាពិសេសរបស់រុស្ស៊ីក្នុងខែកុម្ភៈ គឺជាព័ត៌មានស្វាគមន៍សម្រាប់សហគមន៍អន្តរជាតិ ដោយសារវិបត្តិស្បៀងអាហារបាននឹងកំពុងញាំញីប្រទេសដែលពឹងផ្អែកយ៉ាងខ្លាំងលើការនាំចូលគ្រាប់ធញ្ញជាតិពីអ៊ុយក្រែន និងរុស្ស៊ី។
ទោះជាយ៉ាងណាក៏ដោយ ការអនុវត្តកិច្ចព្រមព្រៀងនេះអាចជាដំណើររដិបរដុបខ្លាំង ចំពេលមានការដាក់ទណ្ឌកម្មរបស់លោកខាងលិច និងការខ្វះការជឿទុកចិត្តគ្នាទៅវិញទៅមករវាងទីក្រុងម៉ូស្គូ និងទីក្រុងគៀវ ក្នុងចំណោមបញ្ហាប្រឈមផ្សេងទៀត។
បន្ទាប់ពីការចុះហត្ថលេខាលើកិច្ចព្រមព្រៀងនេះ រដ្ឋមន្ត្រីការបរទេសរុស្ស៊ីលោក Sergei Lavrov បានអំពាវនាវឱ្យមានការខិតខំប្រឹងប្រែងអនុវត្តប្រកបដោយប្រសិទ្ធភាពនូវកិច្ចព្រមព្រៀងស្តីពីការដឹកជញ្ជូនគ្រាប់ធញ្ញជាតិអ៊ុយក្រែន ពីកំពង់ផែសមុទ្រខ្មៅ និងលើការជំរុញការនាំចេញអាហារ និងជីរបស់រុស្ស៊ី។
លោកបានលើកឡើងថា “ជំនួយរបស់អង្គការសហប្រជាជាតិ ដែលត្រូវបានផ្តល់ដោយស្មោះត្រង់ និងវិធីសាស្រ្តស្ថាបនារបស់សហគមន៍អន្តរជាតិ រួមទាំងបណ្តាប្រទេសលោកខាងលិច នឹងមានសារសំខាន់ក្នុងរឿងនេះ (ការអនុវត្តកិច្ចព្រមព្រៀង)”។
ការកត់សម្គាល់របស់លោក Lavrov បានកើតឡើងនៅពេលដែលបណ្តាប្រទេសលោកខាងលិចដឹកនាំដោយសហរដ្ឋអាមេរិកបានប្រគល់អាវុធដ៍សាហាវដល់អ៊ុយក្រែន និងដាក់ទណ្ឌកម្មជាច្រើនលើរុស្ស៊ី ដោយប្រថុយនឹងការបន្តជម្លោះក្នុងតំបន់ និងទុកឱ្យពិភពលោកចាប់ផ្តើមច្បាប់នេះ៕ប្រែសម្រួល ឈូក បូរ៉ា
