ប្រធានាធិបតីកូរ៉េខាងត្បូង៖ កូរ៉េខាងជើង អាចនឹងធ្វើតេស្ដសាកល្បងអាវុធនុយក្លេអ៊ែរ បានគ្រប់ពេល

សេអ៊ូល៖ ប្រធានាធិបតីកូរ៉េខាងត្បូងលោក Yoon Suk-yeol បានលើកឡើងថា ប្រទេសកូរ៉េខាងជើង បានត្រៀមខ្លួនរួចជាស្រេច ដើម្បីធ្វើការសាកល្បងអាវុធនុយក្លេអ៊ែរនៅពេលណាក៏បានដែលខ្លួនសម្រេចចិត្ត។

លោក Yoon កំពុងឆ្លើយតបទៅនឹងសំណួររបស់អ្នកសារព័ត៌មានអំពីការវាយតម្លៃរបស់ក្រសួងការពារជាតិសហរដ្ឋអាមេរិកដែលថា កូរ៉េខាងជើងបានបញ្ចប់ការត្រៀមលក្ខណៈ ដើម្បីធ្វើតេស្តនុយក្លេអ៊ែរនៅដើមខែនេះ។

គាត់បានប្រាប់អ្នកយកព័ត៌មាននៅពេលគាត់មកដល់កន្លែងធ្វើការថា “យើងជឿថាមិនត្រឹមតែនៅចុងខែនេះទេ ប៉ុន្តែចាប់តាំងពីការសម្ពោធរបស់ខ្ញុំមក វាបានត្រៀមខ្លួនរួចរាល់ហើយ និងអាចធ្វើវាបាននៅពេលណាដែលវាសម្រេចចិត្ត” ។

ប្រទេសកូរ៉េខាងជើង បានធ្វើការសាកល្បងកាំជ្រួចរយៈចម្ងាយខ្លីទៅឆ្ងាយជាបន្តបន្ទាប់ចាប់តាំងពីលោក Yoon ចូលកាន់តំណែងក្នុងខែឧសភា ហើយត្រូវបានគេរំពឹងយ៉ាងទូលំទូលាយថា នឹងអនុវត្តនូវអ្វីដែលនឹងក្លាយជាការសាកល្បងនុយក្លេអ៊ែរលើកទីប្រាំពីររបស់ខ្លួន។

នាយកសេវាស៊ើបការណ៍សម្ងាត់ជាតិ លោក Kim Kyou-hyun បានធ្វើទស្សនកិច្ចដោយមិនប្រកាសមួយទៅកាន់ទីក្រុងវ៉ាស៊ីនតោន កាលពីដើមសប្តាហ៍នេះ ដោយជំរុញឱ្យមានការរំពឹងទុកថា លោកនឹងជួបជាមួយមន្ត្រីចារកម្មកំពូលរបស់សហរដ្ឋអាមេរិក ដើម្បីសម្របសម្រួលការឆ្លើយតបរបស់ពួកគេចំពោះការបង្កហេតុរបស់កូរ៉េខាងជើង៕ប្រែសម្រួល ឈូក បូរ៉ា