បរទេស៖ រុស្ស៊ីគឺជាមហាអំណាចនុយក្លេអ៊ែរ ដែលមានទំនួលខុសត្រូវ ហើយនឹងប្រើប្រាស់អាវុធនុយក្លេអ៊ែរ របស់ខ្លួនតែប៉ុណ្ណោះ ប្រសិនបើមានការវាយប្រហារ ដោយអាវុធប្រល័យលោក ឬប្រសិនបើអត្ថិភាពរបស់ខ្លួន ស្ថិតនៅក្រោមការគំរាមកំហែង។ នេះបើតាម លោក Ivan Nechaev អ្នកនាំពាក្យរបស់ក្រសួងការបរទេស របស់ប្រទេសរុស្ស៊ី បាននិយាយ។
លោក Ivan Nechaev បន្ថែមថា ទន្ទឹមនឹងនោះ មន្ត្រីលោកខាងលិច ខ្លះអះអាងថា នុយក្លេអ៊ែអាចដើរតួនាទីក្នុងសមរភូមិ។
យោងតាមសារព័ត៌មាន RT ចេញផ្សាយនៅថ្ងៃទី១៨ ខែសីហា ឆ្នាំ២០២២ បានឱ្យដឹងថា អ្នកនាំពាក្យរងនៃក្រសួង បាននិយាយក្នុងសន្និសីទសារព័ត៌មាន ប្រចាំថ្ងៃកាលពីថ្ងៃព្រហស្បតិ៍ថា យោងតាមគោលជំហរ នុយក្លេអ៊ែរផ្លូវការរបស់រុស្ស៊ី “ការប្រើប្រាស់ឃ្លាំង អាវុធនុយក្លេអ៊ែរ គឺអាចធ្វើទៅបានតែក្នុងការឆ្លើយតបទៅនឹង ការវាយប្រហារ ជាវិធានការការពារខ្លួន និងក្នុងកាលៈទេសៈធ្ងន់ធ្ងរ” ។
អ្នកការទូតបានឆ្លើយតបទៅនឹងសំណួរអំពីហានិភ័យនៃការកើនឡើងការប្រើប្រាស់នុយក្លេអ៊ែរនៅក្នុងជម្លោះជាមួយអ៊ុយក្រែន។ លោកបាននិយាយថា រុស្ស៊ីមិនស្ថិតនៅក្នុងទម្លាប់នៃ “គំរាមកំហែងនោះទេ ជាពិសេសដោយអាវុធនុយក្លេអ៊ែរ”។ លោក Nechaev បានអះអាងថា ទីក្រុងម៉ូស្គូបានប្ដេជ្ញារក្សាស្ថានការណ៍ក្នុងប្រទេសអ៊ុយក្រែនឲ្យមានលក្ខណៈធម្មតា ហើយមិនចាំបាច់ប្រើជម្រើសនុយក្លេអ៊ែរនៅអ៊ុយក្រែនឡើយ។
លោកបានបង្ហាញការសោកស្ដាយថា មេដឹកនាំនៃមហាអំណាចលោកខាងលិច បានក្លាយជាអ្នកទទួលខុសត្រូវ តិចជាងអ្នកកាន់តំណែង មុនសម័យសង្គ្រាមត្រជាក់ ឆ្ងាយណាស់ នៅពេលនិយាយអំពីបញ្ហារារាំង៕
ប្រែសម្រួលៈ ណៃ តុលា
