អាមេរិក ត្រៀមកញ្ចប់ជំនួយ យោធាគិតជាប្រាក់ ៨០០លានដុល្លារ បន្ថែមទៀត ដល់អ៊ុយក្រែន

បរទេស៖ ប្រភពបាន ប្រាប់សារព័ត៌មាន រ៉យទ័រ កាលពីថ្ងៃព្រហស្បតិ៍ថា សហរដ្ឋអាមេរិក កំពុងរៀបចំកញ្ចប់ជំនួយយោធាមួយផ្សេងទៀត ដែលមានតម្លៃប្រហែល ៨០០ លានដុល្លារ ដើម្បីគាំទ្រអ៊ុយក្រែន ក្នុងជម្លោះរបស់ខ្លួនជាមួយរុស្ស៊ី។

យោងតាមសារព័ត៌មាន RT ចេញផ្សាយនៅថ្ងៃទី១៩ ខែសីហា ឆ្នាំ២០២២ បានឱ្យដឹងថា ប្រធានាធិបតី Joe Biden អាចប្រកាសជាផ្លូវការនូវការសម្រេចចិត្តនេះនៅថ្ងៃសុក្រ ឬនៅចំណុចណាមួយនៅសប្តាហ៍ក្រោយ នេះបើតាមការអះអាងរបស់មន្ត្រីដែលបាននិយាយក្នុងលក្ខខណ្ឌមិនបញ្ចេញឈ្មោះ។

ពួកគេបន្ថែមថា ជំនួយនេះនឹងត្រូវប្រើ Presidential Drawdown Authority ដែលអនុញ្ញាតឱ្យប្រមុខរដ្ឋផ្ទេរអាវុធ លើសពីស្តុក របស់សហរដ្ឋអាមេរិក។ ពួកគេបានបន្ថែមថា ប្រភពមិនបាននិយាយ ពីប្រភេទអាវុធ ជាក់លាក់ដែលត្រូវដាក់បញ្ចូល ក្នុងកញ្ចប់នោះទេ ហើយបានបន្ថែមថា ការចែកចាយ អាវុធអាចផ្លាស់ប្តូរតម្លៃមុនពេល ពួកគេត្រូវបានប្រកាស។ សេតវិមានបានបដិសេធ មិនធ្វើអត្ថាធិប្បាយទេ៕

ប្រែសម្រួលៈ ណៃ តុលា