ពង្រឹងទំនាក់ទំនងជាមួយអាស៊ី, លោក ពូទីន សម្លឹងមើលសមយុទ្ធយោធា ជាមួយសម្ព័ន្ធមិត្តធំរបស់ខ្លួន គឺប្រទេសចិន

បរទេស៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានចូលរួមសមយុទ្ធយោធា ទ្រង់ទ្រាយធំនៅថ្ងៃអង្គារ ដោយមានការចូលរួមពីប្រទេសចិន និងប្រទេសជាមិត្តរុស្ស៊ីមួយចំនួនទៀត ខណៈដែលទីក្រុងមូស្គូស្វែងរក ការពង្រឹងភាពជាដៃគូនៅក្នុងតំបន់អាស៊ី ក្នុងពេលប្រឈមមុខនឹងទណ្ឌកម្ម របស់លោកខាងលិច។

យោងតាមសារព័ត៌មាន The Moscow Times ចេញផ្សាយនៅថ្ងៃទី៦ ខែកញ្ញា ឆ្នាំ២០២២ បានឱ្យដឹងថា រុស្ស៊ីបានរកឃើញថា ខ្លួនកាន់តែឯកោកាន់តែខ្លាំងឡើង នៅពេលដែលភាព តានតឹងរវាងទីក្រុងមូស្គូ និងរដ្ឋធានីលោកខាងលិចកើនឡើង ចាប់តាំងពីរុស្ស៊ីបានបញ្ជូនកងទ័ព ចូលទៅក្នុងប្រទេសអ៊ុយក្រែន លោកខាងលិចគាំទ្រកាលពីខែកុម្ភៈ។

ដោយវាយបកចំពោះការដាក់ទណ្ឌកម្ម ដែលមិនធ្លាប់មានពីមុនមកពី ទីក្រុងវ៉ាស៊ីនតោន និងទីក្រុងប្រ៊ុចសែល លោកពូទីនបានបន្តទំនាក់ទំនង កាន់តែជិតស្និទ្ធជាមួយ បណ្តាប្រទេសនៅអាហ្វ្រិក អាមេរិកខាងត្បូង និងអាស៊ី ជាពិសេសប្រទេសចិន។

លោកពូទីនកាលពីថ្ងៃអង្គារ បានចូលរួមសមយុទ្ធ Vostok-2022 ដែលកំពុងត្រូវបានប្រារព្ធ ឡើងនៅក្នុងកន្លែងហ្វឹកហ្វឺនក្នុងប្រទេសរុស្ស៊ី Far East និងនៅក្នុងទឹកនៃឆ្នេរសមុទ្រ ភាគខាងកើតរបស់ខ្លួន។ លោកពូទីនបានជួបរដ្ឋមន្ត្រីការពារជាតិ Sergei Shoigu និងប្រធានបុគ្គលិកយោធា Valery Gerasimov នៅមូលដ្ឋានយោធា Sergeyevsky ហើយក្រោយមកបានសង្កេតមើល ដំណាក់កាលចុងក្រោយនៃសមយុទ្ធយោធា។

សមយុទ្ធដែលមានការចូលរួម ពីប្រទេសជិតខាងមួយចំនួនរបស់រុស្ស៊ី ក៏ដូចជាប្រទេសស៊ីរី ឥណ្ឌា និងសម្ព័ន្ធមិត្តសំខាន់របស់ខ្លួន គឺប្រទេសចិន បានចាប់ផ្តើមនៅថ្ងៃទី១ ខែកញ្ញា ហើយត្រូវបញ្ចប់នៅថ្ងៃពុធ៕

ប្រែសម្រួលៈ ណៃ តុលា