ម៉ូស្គូ៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៤ ខែកញ្ញា ឆ្នាំ២០២២ថា លោក វ្ល៉ាឌីមៀ ពូទីន ប្រធានាធិបតី របស់ប្រទេសរុស្ស៊ី និងលោក ហ្ស៊ី ជិនពីង ប្រធានាធិបតី របស់ប្រទេសចិន នឹងពិភាក្សាអំពី អ៊ុយក្រែន និងកោះតៃវ៉ាន់ នៅក្នុងកិច្ចប្រជុំមួយនៅក្នុង ប្រទេសអ៊ូសបេគីស្ថាន នៅថ្ងៃព្រហស្បតិ៍នេះ ដែលវិមានក្រឹមឡាំង បានបញ្ជាក់ថា នឹងប្រារព្ធឡើង ដែលមាន“សារៈសំខាន់ណាស់” ដោយសារស្ថានភាព ភូមិសាស្ត្រនយោបាយ ។
លោក ហ្ស៊ី នឹងចាកចេញពីប្រទេសចិន ជាលើកដំបូងក្នុងរយៈពេល ជាង២ឆ្នាំ សម្រាប់ការធ្វើដំណើរមួយសប្តាហ៍នេះ ទៅកាន់អាស៊ីកណ្តាល ជាកន្លែងដែលលោកនឹងជួបជាមួយ លោក ពូទីន ត្រឹមតែ១ខែមុន ពេលដែលលោកត្រូវបានកំណត់ ដើម្បីបំពេញតួនាទី ជាមេដឹកនាំចិន ដ៏មានឥទ្ធិពលបំផុត ចាប់តាំងពីលោកម៉ៅ សេទុង ។
លោក Yuri Ushakov ជំនួយការរបស់វិមានក្រឹមឡាំង បានលើកឡើងនៅក្នុងសន្និសីទ សង្ខេប នៅទីក្រុងម៉ូស្គូថា “លោកប្រធានាធិបតីនឹងពិភាក្សា ទាំងរបៀបវារៈទ្វេភាគី និងប្រធានបទសំខាន់ៗ ក្នុងតំបន់ និងអន្តរជាតិ” ។
លោកបានឲ្យដឹងទៀតថា “តាមធម្មជាតិ ពួកគេនឹងផ្តល់នូវការវាយតម្លៃ ជាវិជ្ជមាននៃកម្រិត នៃការជឿទុកចិត្តខ្ពស់ ដែលមិនធ្លាប់មានពីមុនមក នៅក្នុងភាពជាដៃគូយុទ្ធសាស្ត្រទ្វេភាគី” ។
ភាពជាដៃគូ “គ្មានដែនកំណត់” កាន់តែស៊ីជម្រៅរវាងមហាអំណាច ដែលកំពុងកើនឡើង នៃប្រទេសចិន និងធនធានធម្មជាតិរបស់រុស្ស៊ី គឺជាការអភិវឌ្ឍន៍ភូមិសាស្ត្រនយោបាយ ដែលលោកខាងលិច កំពុងមើលដោយក្តីបារម្ភ ។
គួរបញ្ជាក់ថា កិច្ចប្រជុំនេះនឹងផ្តល់ឱកាសឱ្យលោក ហ្ស៊ី គូសបញ្ជាក់អំពីអំណាចរបស់លោក ខណៈដែលលោក ពូទីន អាចបង្ហាញពីភាពលំអៀងរបស់រុស្ស៊ីចំពោះអាស៊ី ។ មេដឹកនាំទាំង២អាចបង្ហាញ ពីការប្រឆាំងរបស់ពួកគេ ចំពោះសហរដ្ឋអាមេរិក ដូចដែលលោកខាងលិចព្យាយាម ដាក់ទណ្ឌកម្មមកលើរុស្ស៊ី ចំពោះអ្វីដែលទីក្រុងម៉ូស្គូហៅថា ជា “ប្រតិបត្តិការយោធាពិសេស” នៅអ៊ុយក្រែន ៕
ដោយ៖ ម៉ៅ បុប្ផាមករា
