បរទេស៖ ទាហានអ៊ុយក្រែនកំពុងធ្វើការវាយប្រហារ ដោយកាំភ្លើងធំ ទៅលើទីក្រុង Energodar ក្នុងតំបន់ Zaporozhye ដែលជាខេត្តមួយ ក្នុងចំណោមខេត្តចំនួនបួន ដែលទើបដាក់បញ្ចូល ក្នុងប្រទេសរុស្ស៊ី។ អភិបាលស្តីទីលោក Yevgeny Balitsky បាននិយាយកាលពីថ្ងៃពុធ ដោយចោទប្រកាន់ទីក្រុងគៀវ ពីការព្យាយាមធ្វើឱ្យ មានជីវិតមិនអាចទ្រាំទ្រ បានសម្រាប់អ្នកស្រុកនៅតំបន់នោះ។
យោងតាមសារព័ត៌មាន RT ចេញផ្សាយនៅថ្ងៃទី៥ ខែតុលា ឆ្នាំ២០២២ បានឱ្យដឹងថា លោក Balitsky បានប្រាប់ទូរទស្សន៍រុស្ស៊ីកាលពីថ្ងៃពុធថា “សត្រូវបានផ្តោតលើការបាញ់ផ្លោង ទៅលើរោងចក្រថាមពល [ឧស្ម័ន] របស់យើង ដើម្បីបង្អាក់ការរៀបចំរបស់យើងសម្រាប់រដូវរដូវរងា ហើយដើម្បីបង្ហាញថា អាជ្ញាធរមិនមានសមត្ថភាព ក្នុងការកំដៅទីក្រុងនោះទេ” ។
លោកជឿថា ទីក្រុងគៀវមានបំណង “បំផ្លាញហេដ្ឋារចនាសម្ព័ន្ធ និងធ្វើឱ្យ [Energodar] មិនអាចរស់នៅបាន” ។ លោកបានទទូចថា រដ្ឋាភិបាលអ៊ុយក្រែន ចង់គ្រប់គ្រងតំបន់នេះឡើងវិញ ប៉ុន្តែមិនចង់ឲ្យប្រជាជនដែលរស់នៅក្នុងតំបន់នោះនៅដដែល។
លោក Balitsky បាននិយាយថា ក្នុងរយៈពេល ២៤ម៉ោងកន្លងទៅ មានការវាយប្រហារដោយកាំភ្លើងធំជាង ៤០ មកលើ និងជុំវិញទីក្រុង ដោយមានការបាញ់ផ្លោងមួយចំនួនធ្វើឡើងក្នុងលក្ខណៈវឹកវរ។
លោកបានអះអាងថា កាំភ្លើងធំរបស់អ៊ុយក្រែន ហាក់ដូចជាមិនខ្វល់ពីការជ្រើសរើស គោលដៅ ដែលមានតម្លៃខ្ពស់នោះទេ ហើយបានចំណាយអាវុធ ដែលមានតម្លៃថ្លៃ ដែលផ្តល់ដោយសហរដ្ឋអាមេរិក ដើម្បីបង្កការខូចខាតតិចតួច៕
ប្រែសម្រួល៖ ណៃ តុលា
Recommended for you
