ញូវយ៉ក៖ មហាសន្និបាតអង្គការ សហប្រជាជាតិបានអនុម័ត សេចក្តីសម្រេចមួយកាលពីថ្ងៃពុធ ដែលរិះគន់រុស្ស៊ី ចំពោះការបញ្ចូលតំបន់អ៊ុយក្រែនចំនួន៤ កាលពីខែមុន និងកំណត់ការធ្វើប្រជាមតិ ដែលសំដៅលើការបញ្ជាក់ ភាពត្រឹមត្រូវនៃការពង្រីកទឹកដីគឺ “ខុសច្បាប់” ។
សភារបស់ស្ថាប័នពិភពលោកមួយនេះ ក៏បានជំរុញឱ្យទីក្រុងម៉ូស្គូ ដកសេចក្តីប្រកាសនៃការបញ្ចូលតំបន់ Luhansk, Donetsk, Kherson និង Zaporizhzhia ដែលជាផ្នែកនៃការលុកលុយ ទេសជិតខាងរបស់ខ្លួន ដែលបានចាប់ផ្តើមកាលពីក្នុងខែកុម្ភៈ។
សភាដែលមានសមាជិកចំនួន ១៩៣រូប បានអនុម័តលើសេចក្តីសម្រេចនេះ ដោយសំឡេងគាំទ្រ ១៤៣។ សមាជិក ៥នាក់ រួមទាំងរុស្ស៊ី និងបេឡារុស្ស បានជំទាស់ ខណៈចិន ឥណ្ឌា និង ៣៣នាក់ផ្សេងទៀត អនុប្បវាទ។
មហាសន្និបាតបាន “ថ្កោលទោស” ការធ្វើប្រជាមតិ និងការបញ្ចូលជាបន្តបន្ទាប់នៃតំបន់ និងព្រឹត្តិការណ៍នានា “មិនមានសុពលភាពក្រោមច្បាប់អន្តរជាតិ និងមិនមានមូលដ្ឋាន សម្រាប់ការផ្លាស់ប្តូរស្ថានភាពនៃ តំបន់ទាំងនេះនៃអ៊ុយក្រែននោះទេ” ។
សន្និបាតបានឲ្យដឹងទៀតថា សកម្មភាពនេះគឺ “មិនស្របនឹង” គោលការណ៍នៃធម្មនុញ្ញ អង្គការសហប្រជាជាតិ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិក ប្រចាំអង្គការសហប្រជាជាតិ បានឲ្យដឹងនៅក្នុងសម័យប្រជុំថា “ប្រទេសមួយមិនអាចយកទឹកដី នៃប្រទេសមួយផ្សេងទៀត ដោយកម្លាំងបាននោះទេ” ។ អ្នកស្រីបានបន្ដថា “ប្រសិនបើអ្នកជារដ្ឋសមាជិក របស់អង្គការសហប្រជាជាតិ ព្រំដែនរបស់អ្នក គឺជារបស់អ្នក ហើយត្រូវបានការពារដោយច្បាប់អន្តរជាតិ”។
ឯកអគ្គរដ្ឋទូតរុស្ស៊ី Vasily Nebenzya បានការពារការបញ្ចូលឧបសម្ព័ន្ធនេះ ដោយឲ្យដឹងនៅក្នុងសម័យប្រជុំថា លទ្ធផលនៃការធ្វើប្រជាមតិបង្ហាញថា ប្រជាជនក្នុងតំបន់ “មិនចង់ត្រឡប់ទៅអ៊ុយក្រែនវិញនោះទេ” ហើយការបោះឆ្នោតត្រូវបានធ្វើឡើង “ស្របតាមបទដ្ឋាន និងគោលការណ៍នៃច្បាប់អន្តរជាតិ” ៕
ប្រែសម្រួល ឈូក បូរ៉ា
