គៀវ ៖ កងទ័ពអាកាសអ៊ុយក្រែន កំពុងទាមទារយកជ័យជម្នះ បន្ទាប់ពីខ្លួនឲ្យដឹងថា ខ្លួនបានបំផ្លាញយន្តហោះដ្រូនប្រភេទ “kamikaze” Shahed-136 ដែលផលិតដោយប្រទេសអ៊ីរ៉ង់ចំនួន ៨ គ្រឿង ដែលរុស្ស៊ីបានបាញ់បង្ហោះ ក្នុងការវាយប្រហារ តាមអាកាសចុងក្រោយ របស់ខ្លួនលើអ៊ុយក្រែន។
បញ្ជាការដ្ឋានទ័ពអាកាស នៃកងកម្លាំងប្រដាប់អាវុធអ៊ុយក្រែន បានឲ្យដឹងនៅក្នុងការបង្ហោះហ្វេសប៊ុក កាលពីយប់ថ្ងៃចន្ទថា យន្តហោះចម្បាំងអ៊ុយក្រែន បានបាញ់ទម្លាក់យន្តហោះដ្រូន ចំនួន ៦គ្រឿង និងពីរគ្រឿងទៀត ត្រូវបានដកចេញ ដោយកងកម្លាំងជើងគោក ដោយប្រើកាំភ្លើង ប្រឆាំងយន្តហោះ ។
ការវាយប្រហារ ដែលស្ទាក់ចាប់ គឺជាការវាយប្រហារ តាមអាកាសថ្មីៗបំផុតដែលរុស្ស៊ី បានធ្វើប្រឆាំងនឹងអ៊ុយក្រែន។ ពួកគេមកខណៈដែលអ៊ុយក្រែន បានបង្កើនសម្ពាធលើអ៊ីរ៉ង់ ឱ្យបញ្ឈប់ការផ្តល់អាវុធដល់រុស្ស៊ី ។
របាយការណ៍ The Kyiv Independent រាយការណ៍ថា ការវាយប្រហារដោយយន្តហោះដ្រូន ត្រូវបានរារាំងដោយបញ្ជាការកងទ័ពអាកាសកណ្តាល ដែលរួមមានរដ្ឋធានីគៀវ និងសង្កាត់រដ្ឋបាលជុំវិញ។
កងទ័ពអាកាសរបស់អ៊ុយក្រែន ក៏បានរាយការណ៍ផងដែរថា នៅព្រឹកព្រលឹម ខ្លួនបានបាញ់ទម្លាក់កាំជ្រួច Cruise Kalibr ចំនួនពីរគ្រាប់ ដែលបាញ់ចេញពីសមុទ្រខ្មៅ។ កាសែត Newsweek មិនអាចផ្ទៀងផ្ទាត់ការទាមទារដោយឯករាជ្យបាននោះទេ។
អាជ្ញាធរអ៊ុយក្រែនបានឲ្យដឹងថា យ៉ាងហោចណាស់មនុស្ស ៤នាក់ ត្រូវបានសម្លាប់ ហើយអ្នកស្រុក ១៨នាក់ត្រូវបានជួយសង្គ្រោះ ពីអគារដែលរងការខូចខាត បន្ទាប់ពីប្រទេសរុស្ស៊ី បានបាញ់ បង្ហោះយន្តហោះដ្រូនជាង ២០គ្រឿងនៅលើទីក្រុង ដែលមានប្រជាជនច្រើនបំផុត របស់ប្រទេសអ៊ុយក្រែន។
នាពេលថ្មីៗនេះ ប្រទេសរុស្ស៊ីបានចាប់ផ្តើមប្រើប្រាស់ យន្តហោះដ្រូនធុន Shahed-136 ដែលអាចគេចពីការចាប់រ៉ាដា និងវាយចូលទៅក្នុងគោលដៅ នេះបើយោងតាមការចុះផ្សាយ របស់ទីភ្នាក់ងារសារព័ត៌មានអ៊ុយក្រែន Newsweek។
បន្ទាប់ពីការវាយប្រហារលើទីក្រុងគៀវ ក្រសួងការបរទេសអ៊ីរ៉ង់ម្តងទៀតបានបដិសេធថា ទីក្រុងតេអេរ៉ង់មិនបានផ្តល់ការគាំទ្រផ្នែកយោធាដល់ទីក្រុងមូស្គូ ដោយបង្ហោះលើ Twitter នៅព្រឹកថ្ងៃច័ន្ទនូវសេចក្តីប្រកាសមួយ “ថាខ្លួនមិននៅខាងណាក្នុងសង្គ្រាមរុស្ស៊ី-អ៊ុយក្រែននោះឡើយ”៕
ប្រែសម្រួល ឈូក បូរ៉ា
