បរទេស៖ ទីភ្នាក់ងារព័ត៌មាន Interfax បានរាយការណ៍ដោយដកស្រង់សម្តី មន្ត្រីក្នុងតំបន់ថា យន្តហោះយោធាមួយគ្រឿង បានធ្លាក់កាលពីថ្ងៃច័ន្ទចូលទៅក្នុងអគារ លំនៅដ្ឋានមួយនៅទីក្រុងកំពង់ផែ Yeysk ភាគខាងត្បូងនៃតំបន់ Krasnodar របស់ប្រទេសរុស្ស៊ី។
យោងតាមសារព័ត៌មាន The Moscow Times ចេញផ្សាយនៅថ្ងៃទី១៨ ខែតុលា ឆ្នាំ២០២២ បានឱ្យដឹងដោយផ្អែកតាមសារព័ត៌មានរដ្ឋ RIA Novosti បានរាយការណ៍ថា ក្រសួងការពារជាតិរុស្ស៊ី បាននិយាយថា យន្តហោះចម្បាំងប្រភេទ Su-34 បានធ្លាក់បន្ទាប់ពី ហោះចេញពីអាកាសយានដ្ឋាន ក្នុងស្រុកសម្រាប់ការហោះហើរហ្វឹកហាត់។
មនុស្ស ១៣នាក់បានស្លាប់ និង ១៩នាក់ បានរងរបួស, នេះបើយោងតាមមន្ត្រីក្រសួងសុខាភិបាល ដែលដកស្រង់សម្តីដោយ Interfax កាលពីថ្ងៃអង្គារ។
គណៈកម្មាធិការស៊ើបអង្កេតរបស់រុស្ស៊ី ដែលស៊ើបអង្កេតឧក្រិដ្ឋកម្មធ្ងន់ធ្ងរ បាននិយាយថា ការធ្លាក់នេះប្រហែលជាបណ្តាលមកពី “ដំណើរការខុសបច្ចេកទេសគ្រឿងម៉ាស៊ីន”។
គេបានបើកការស៊ើបអង្កេតព្រហ្មទណ្ឌ លើការរំលោភច្បាប់ហោះហើរ ដែលអាចកើតមាន ហើយបាន “រឹបអូសយកគំរូប្រេងនៅឯអាកាសយានដ្ឋាន ចេញដំណើរ” និង “ម៉ាស៊ីនថតយន្តហោះ នៅកន្លែងធ្លាក់យន្តហោះ”៕ ប្រែសម្រួលៈ ណៃ តុលា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
