តូក្យូ៖ ប្រទេសជប៉ុន សហរដ្ឋអាមេរិក និងប្រទេសចំនួន ៤ផ្សេងទៀតបានថ្កោលទោសសង្គ្រាមរបស់រុស្ស៊ី នៅអ៊ុយក្រែន នៅក្នុងការចេញផ្សាយរួមគ្នាមួយ ខណៈដែលពួកគេបានបញ្ចប់កិច្ចប្រជុំរដ្ឋមន្ត្រីហិរញ្ញវត្ថុនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក នៅទីក្រុងបាងកក។
កិច្ចប្រជុំ APEC កាលពីថ្ងៃព្រហស្បតិ៍បានបញ្ចប់ដោយមិនចេញសេចក្តីថ្លែងការណ៍រួមដោយសារតែភាពប្រេះឆាក្នុងចំណោមប្រទេស ដែលចូលរួមជុំវិញទស្សនៈរបស់ពួកគេលើការឈ្លានពានរបស់រុស្ស៊ី លើអ៊ុយក្រែន ដែលបានចាប់ផ្តើមកាលពីខែកុម្ភៈ។
នៅក្នុងសេចក្ដីថ្លែងការណ៍បានឲ្យដឹងថា “យើងថ្កោលទោសក្នុងលក្ខខណ្ឌដ៏ខ្លាំងបំផុត ចំពោះសង្គ្រាមឈ្លានពាន ដែលមិនបង្កហេតុរបស់រុស្ស៊ីប្រឆាំងនឹងអ៊ុយក្រែន រួមទាំងការវាយប្រហារនាពេលថ្មីៗនេះរបស់រុស្ស៊ី លើជនស៊ីវិល និងការប៉ុនប៉ងបញ្ចូលតំបន់ខុសច្បាប់របស់ពួកគេនៅក្នុងអ៊ុយក្រែន” ដែលរួមមានប្រទេសអូស្ត្រាលី កាណាដា នូវែលសេឡង់ និងកូរ៉េខាងត្បូងផងដែរ។
ប្រទេសប្រជាធិបតេយ្យទាំង៦ បានទាមទារឱ្យទីក្រុងម៉ូស្គូ “បញ្ឈប់ជាបន្ទាន់នូវការប្រើប្រាស់កម្លាំងរបស់ខ្លួន ហើយដកកងកម្លាំងយោធាទាំងអស់របស់ខ្លួនចេញពីទឹកដីអ៊ុយក្រែនទាំងស្រុង និងដោយគ្មានលក្ខខណ្ឌ”។
ការចេញផ្សាយនេះក៏បានអំពាវនាវឱ្យសហគមន៍អន្តរជាតិរួបរួមគ្នាប្រឆាំងនឹងការឈ្លានពាន ដែលបំផ្លាញសណ្តាប់ធ្នាប់អន្តរជាតិដោយផ្អែកលើច្បាប់ ខណៈពេលដែលបង្ហាញពីការព្រួយបារម្ភអំពីផលប៉ះពាល់ជាសកលនៃសង្គ្រាម។
ប្រទេសទាំង៦ បានឲ្យដឹងថា ទង្វើរបស់ទីក្រុងម៉ូស្គូ “បានធ្វើឱ្យខ្សែសង្វាក់ផ្គត់ផ្គង់សកលកាន់តែតានតឹង រួមចំណែកដល់សម្ពាធអតិផរណា និងធ្វើឱ្យប៉ះពាល់ដល់ការងើបឡើងវិញរបស់សេដ្ឋកិច្ចពិភពលោកឆ្ពោះទៅរកកំណើនដ៏រឹងមាំ មានតុល្យភាព រួមបញ្ចូល ច្នៃប្រឌិត និងនិរន្តរភាព”៕ប្រែសម្រួល ឈូក បូរ៉ា
