គៀវ៖ ទីភ្នាក់ងារសារព័ត៌មាន Interfax-Ukraine បានរាយការណ៍ ដោយដកស្រង់សម្តីរដ្ឋមន្ត្រីសម្រាប់ ការអភិវឌ្ឍន៍សហគមន៍ និងដែនដីអ៊ុយក្រែនលោក Oleksiy Chernyshov ថា អ៊ុយក្រែនត្រូវការប្រាក់ចំនួន ៤ពាន់លានអឺរ៉ូ (ប្រហែល ៣,៩៧ពាន់លានដុល្លារ) ដើម្បីឆ្លងកាត់រដូវរងាខាងមុខនេះ។
លោក Chernyshov បានឲ្យដឹងនៅឯសន្និសីទ អ្នកជំនាញអន្តរជាតិស្តីពីការងើបឡើងវិញ ការកសាងឡើងវិញ និងទំនើបកម្មនៃអ៊ុយក្រែន នៅទីក្រុងប៊ែរឡាំង ប្រទេសអាល្លឺម៉ង់ថា “យើងត្រូវការប្រាក់ចំនួន ៤ពាន់លានអឺរ៉ូ ដើម្បីឆ្លងកាត់រដូវរងានេះ ដើម្បីជួសជុលផ្ទះ ដើម្បីជួយដល់ការថែទាំសុខភាព និងការផ្គត់ផ្គង់ថាមពល” ។
រដ្ឋមន្ត្រីរូបនេះបានលើកឡើងថា ក្រៅពីនេះអ៊ុយក្រែន ខ្វះឧបករណ៍បម្រុង សម្រាប់ការផ្គត់ផ្គង់ទឹក និងថាមពល ដូចជាស្ថានីយ៍បន្សុតទឹកចល័ត ស្ថានីយ៍កំដៅចល័ត ម៉ាស៊ីនម៉ាស៊ូត និងម៉ាស៊ីនកម្តៅអគ្គីសនី។
អ៊ុយក្រែនកំពុងប្រឈមនឹង វិបត្តិថាមពលនៅមុនរដូវត្រជាក់ រដូវរងាដោយសារជម្លោះជាមួយរុស្ស៊ី ដែលបានចាប់ផ្តើមនៅថ្ងៃទី ២៤ ខែកុម្ភៈ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
កាលពីថ្ងៃទី១៨ ខែតុលា ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានលើកឡើងថា ការវាយប្រហាររបស់រុស្ស៊ី បានបំផ្លាញស្ថានីយថាមពល របស់អ៊ុយក្រែនប្រហែល ៣០ភាគរយ ដែលបណ្តាលឱ្យមានការ ដាច់ភ្លើងដ៏ធំនៅទូទាំងប្រទេស ៕
ប្រែសម្រួល ឈូក បូរ៉ា
