បរទេស៖ រដ្ឋមន្ត្រីការពារជាតិរុស្សី លោក Sergey Shoigu បានព្រមានឱ្យដឹងជាមុនទៅសមភាគីឥណ្ឌា និងចិនរបស់លោកថា រដ្ឋាភិបាលទីក្រុងគៀវ អាចបំផ្ទុះគ្រាប់បែកកខ្វក់ ដែលជាគ្រាប់មានធាតុវិទ្យុសកម្ម។ លោកបានលើកឡើងពីបញ្ហានេះក្នុងអំឡុងពេលទូរស័ព្ទជាមួយ Rajnath Singh ខាងភាគីឥណ្ឌានិង Wei Fenghe ភាគីចិន កាលពីថ្ងៃពុធ។
យោងតាមសារព័ត៌មាន RT ចេញផ្សាយនៅថ្ងៃទី២៧ ខែតុលា ឆ្នាំ២០២២ថា លោក Shoigu បានបញ្ជូនបន្ត “ការព្រួយបារម្ភរបស់លោកអំពីការបង្កហេតុដែលអាចកើតមានដោយអ៊ុយក្រែន” នេះបើយោងតាមសេចក្តីថ្លែងការណ៍របស់ក្រសួងការពារជាតិរុស្ស៊ី។ មន្ត្រីយោធាកំពូលរបស់ទីក្រុងមូស្គូ ធ្លាប់បានទាក់ទងទៅអ្នកដែលមានឋានៈដូចគ្នា ដូចជា សហរដ្ឋអាមេរិក ចក្រភពអង់គ្លេស និងប្រទេសមួយចំនួនទៀត ដើម្បីបញ្ជាក់អំពីការគំរាមកំហែងនេះ។
ក្រោយមកលោក Singh បានសរសេរនៅលើ Twitter ថា លោកបានប្រាប់លោក Shoigu ថា ទាំងសងខាងមិនគួរងាកទៅរកការប្រើប្រាស់អាវុធនុយក្លេអ៊ែរ ឬអាវុធវិទ្យុសកម្មនោះទេ។ លោកបានបញ្ជាក់ជាថ្មីថា ប្រទេសឥណ្ឌាអំពាវនាវឲ្យភាគីនានា «បន្តតាមផ្លូវនៃការសន្ទនា និងការទូតសម្រាប់ការដោះស្រាយជម្លោះនៅដំណាក់កាលដំបូង»។
យ៉ាងណាក៏ដោយ កាលពីថ្ងៃចន្ទ រដ្ឋមន្ត្រីការបរទេសអាមេរិក អង់គ្លេស និងបារាំងបានចេញសេចក្តីថ្លែងការណ៍រួមមួយ ដោយច្រានចោលការអះអាងរបស់រុស្ស៊ីថា ជា “ការចោទប្រកាន់នេះ មិនពិតប្រកបដោយតម្លាភាព”៕
