គៀវ៖ បញ្ហាខ្សែសង្វាក់ផ្គត់ផ្គង់ និងកង្វះមីក្រូឈីប ដោយសារសង្គ្រាម ដែលកំពុងបន្តនៅអ៊ុយក្រែន អាចគំរាមកំហែងដល់ឃ្លាំងស្តុកអាវុធរបស់សហរដ្ឋអាមេរិក នេះបើយោងតាមការចុះផ្សាយ របស់ទីភ្នាក់ងារសារព័ត៌មាន Newsweek។
សារព័ត៌មាន Financial Times បានរាយការណ៍ថា អ្នកម៉ៅការផ្នែកការពារជាតិធំៗជាច្រើន របស់សហរដ្ឋអាមេរិក រួមមាន Raytheon, Lockheed Martin, Boeing និង Northrop Grumman បានព្រមានកាលពីថ្ងៃព្រហស្បតិ៍ថា កង្វះខាតផ្នែក និងបន្ទះឈីប អាចបន្តក្នុងរយៈពេលពីរឆ្នាំខាងមុខ។
លោក James D. Taiclet ប្រធាន និងជានាយកប្រតិបត្តិនៃក្រុមហ៊ុន Lockheed Martin បានឲ្យដឹងក្នុងអំឡុងពេលការហៅរកប្រាក់ចំណូលនាពេលថ្មីៗនេះថាក្រុមហ៊ុន “បន្តរំពឹងថានឹងមានកំណើនក្នុងរយៈពេលវែង ប៉ុន្តែជាមួយនឹងផលប៉ះពាល់នៃជំងឺរាតត្បាត ដែលនៅសេសសល់ និងបញ្ហាប្រឈមនៃខ្សែសង្វាក់ផ្គត់ផ្គង់ នៅតែបន្ត យើងឥឡូវនេះ រំពឹងថានឹងត្រលប់ទៅកំណើននៅឆ្នាំ២០២៤ ជាមួយនឹងការលក់ឆ្នាំ២០២៣ គឺប្រហែលស្មើនឹងការរំពឹងទុក ឆ្នាំ២០២២ របស់យើង”។
ការកត់សម្គាល់នេះកើតឡើងចំពេល ដែលសង្រ្គាមដែលបានបន្តនៅក្នុងប្រទេសអ៊ុយក្រែន ចាប់តាំងពីរុស្ស៊ីបានចាប់ផ្តើមការលុកលុយជាលើកដំបូងនៅថ្ងៃទី២៤ ខែកុម្ភៈ។
សហរដ្ឋអាមេរិក និងសម្ព័ន្ធមិត្តលោកខាងលិចផ្សេងទៀត បានបន្តផ្គត់ផ្គង់អ៊ុយក្រែន ជាមួយនឹងជំនួយផ្នែកយោធា រួមទាំងសព្វាវុធដូចជា ប្រព័ន្ធមីស៊ីលពីដីទៅអាកាសកម្រិតខ្ពស់ជាតិ ( NASAMS) ដែលត្រូវបានបង្កើតឡើងដោយ Raytheon ក៏ដូចជា High Mobility Artillery Rocket Systems (HIMARS) ដែលត្រូវបានបង្កើតឡើងដោយក្រុមហ៊ុន Lockheed Martin ។
លោកស្រី Kathy Warden នាយកប្រតិបត្តិកំពូលនៅ Northrop Grumman បានឲ្យដឹងក្នុងអំឡុងពេលហៅរកប្រាក់ចំណូលថា លោកស្រីមិនរំពឹងថាបញ្ហាខ្សែសង្វាក់ផ្គត់ផ្គង់ “នឹងកាន់តែប្រសើរឡើង” នេះបើយោងតាមកាសែត Times ។ Northrop Grumman ផលិតឧបករណ៍សម្រាប់ B-2 Spirit របស់យោធាសហរដ្ឋអាមេរិក ដែលត្រូវបានគេស្គាល់ថា ជាយន្តហោះទម្លាក់គ្រាប់បែកបំបាំងកាយ។
Frank St. John នាយកប្រតិបត្តិនៃក្រុមហ៊ុន Lockheed Martin បានឲ្យដឹងទៅកាន់កាសែត Times ថា ចាប់តាំងពីអាវុធមួយចំនួនរបស់ពួកគេប្រើប្រាស់បន្ទះឈីបរាប់សិបនោះ កង្វះខាតបាននាំឱ្យមានការកើនឡើងនូវពេលវេលានៃការអភិវឌ្ឍន៍សម្រាប់បច្ចេកវិទ្យាថ្មី៕ ប្រែសម្រួល ឈូក បូរ៉ា
