ម៉ូស្គូ ៖ រដ្ឋមន្ត្រីការបរទេស រុស្ស៊ី លោក Sergei Lavrov បានផ្តល់សញ្ញាថា វិមានក្រឹមឡាំង អាចត្រៀមខ្លួនរួចជាស្រេច ក្នុងការចរចាបញ្ចប់ សង្គ្រាមអ៊ុយក្រែន ដរាបណាលោកខាងលិច បំពេញលក្ខខណ្ឌជាក់លាក់ ។
ការកត់សម្គាល់របស់លោក Lavrov ធ្វើឡើងជាង ៨ខែ បន្ទាប់ពីប្រធានាធិបតីរុស្ស៊ីលោក វ្លាឌីមៀ ពូទីន បានចាប់ផ្តើម “ប្រតិបត្តិការយោធាពិសេស” នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ។
ទោះបីជាដំបូងឡើយ ទីក្រុងមូស្គូ សង្ឃឹមសម្រាប់ជ័យជម្នះយ៉ាងរហ័ស ប៉ុន្តែការឈ្លានពាននេះបានបង្ហាញ ពីភាពទន់ខ្សោយនៅក្នុងយោធារបស់ពួកគេ ដែលបានធ្វើឱ្យវិមានក្រឹមឡាំងមានការកើនឡើង ។
ជាងនេះទៅទៀត អ៊ុយក្រែន បានទទួលការគាំទ្រពីលោកខាងលិច ដោយបានពង្រឹង កិច្ចខិតខំប្រឹងប្រែងការពារជាតិ និងអនុញ្ញាតឱ្យយោធារបស់ខ្លួន បើកការវាយលុកដ៏ខ្លាំងក្លាមួយ ដើម្បីដណ្តើមយកទឹកដី ដែលកាន់កាប់មកវិញ ។
នៅពេលដែលការប្រយុទ្ធគ្នាកាន់តែខ្លាំងក្លា ការចរចាររវាងប្រទេសអឺរ៉ុបខាងកើត ទាំងពីរបានជាប់គាំង។ អ៊ុយក្រែនដែលបានទទួលជោគជ័យគួរឲ្យភ្ញាក់ផ្អើលបានស្នើថា យោធា របស់ខ្លួននឹងបន្តប្រយុទ្ធ រហូតដល់រុស្ស៊ីត្រូវបានបណ្តេញ ចេញទាំងស្រុងពីទឹកដីរបស់ខ្លួន ។ ទន្ទឹមនឹងនេះ រុស្ស៊ីបានបង្ហាញ ពីចំណាប់ អារម្មណ៍តិចតួចក្នុងការបញ្ចប់សង្រ្គាម បើទោះបីជាប្រឈម នឹងការខាតបង់កាន់តែច្រើន ក៏ដោយ។
ទោះជាយ៉ាងណា ក៏ដោយ លោក Lavrov បានពិភាក្សាអំពីលទ្ធភាពនៃការចរចាររវាងរុស្ស៊ី និងលោកខាងលិច ក្នុង អំឡុងពេលបទ សម្ភាសន៍មួយនៅលើកញ្ចក់ ទូរទស្សន៍រដ្ឋរុស្ស៊ី សារព័ត៌មានរដ្ឋរុស្ស៊ី RIA Novosti បានរាយការណ៍កាលពីថ្ងៃសៅរ៍ ។ ក្នុងនោះលោក បានលើកឡើងថា ប្រទេសរុស្ស៊ី “ត្រៀមខ្លួនជានិច្ច ដើម្បីស្តាប់សហសេវិកលោកខាងលិច របស់យើង ប្រសិនបើពួកគេស្នើសុំមួយផ្សេងទៀត ដើម្បីរៀបចំការសន្ទនា” ។
លោកបានដាក់លក្ខខណ្ឌពីរ ដែលលោកខាងលិច ត្រូវយល់ព្រមដើម្បីឲ្យការចរចា សម្រេចបានជោគជ័យ នេះបើយោងតាមការចុះផ្សាយ របស់ទីភ្នាក់ងារសារព័ត៌មាន Newsweek ។
លោក Lavrov បានលើកឡើងថា លោកខាងលិចនឹងត្រូវ “គិតគូរយ៉ាងពេញលេញនូវផលប្រយោជន៍ របស់សហព័ន្ធរុស្ស៊ី និងសន្តិសុខរបស់ខ្លួន”។ ជាច្រើនឆ្នាំមកនេះ ប្រទេសរុស្ស៊ី បានលើកឡើងពីការព្រួយបារម្ភ អំពីការ ពង្រីកអង្គការសន្ធិសញ្ញា អាត្លង់ទិកខាងជើង (NATO) ដែលវិមានក្រឹមឡាំងចាត់ទុកថា ជាការគំរាមកំហែង ដល់ផលប្រយោជន៍ សន្តិសុខរបស់ខ្លួន ៕
ប្រែសម្រួល ឈូក បូរ៉ា
