គៀវ៖ ប្រមុខយោធាក្នុងតំបន់របស់ទីក្រុងគៀវ បានឲ្យដឹងថា ទឹកដីភាគខាងជើងអ៊ុយក្រែន បានរៀបចំ “ឃ្លាំងពិសេស” ជាច្រើនរយកន្លែង ដើម្បីរៀបចំសម្រាប់ការវាយប្រហារ នុយក្លេអ៊ែរដ៏មានសក្តានុពល ពីប្រទេសរុស្ស៊ី។
លោក Oleksiy Kuleba ប្រធានរដ្ឋបាលយោធាក្នុងតំបន់របស់ទីក្រុង បានឲ្យដឹងនៅក្នុងបទសម្ភាសន៍មួយ ដែលបានចេញផ្សាយកាលពីថ្ងៃអង្គារ ដោយប៉ុស្តិ៍ទូរទស្សន៍អ៊ុយក្រែន Hromadske ថារដ្ឋាភិបាលអ៊ុយក្រែន កំពុងរៀបចំសម្រាប់ “សេណារីយ៉ូករណីដ៏អាក្រក់បំផុត” នៅពេលដែលភាពតានតឹង នៅតែបន្តកើនឡើង នៅក្នុងសង្គ្រាមរុស្ស៊ី-អ៊ុយក្រែន។
លោក Kuleba បានលើកឡើងថា “រយៈពេលប្រាំបីខែចុងក្រោយនេះ បានបង្រៀនយើងថាអ្វីៗ អាចកើតឡើង” នេះបើយោងតាមរបាយការណ៍ លោកថា “ក្នុងនាមជាមន្ត្រីម្នាក់ ខ្ញុំកំពុងរៀបចំសម្រាប់សេណារីយ៉ូ ករណីដ៏អាក្រក់បំផុត ប៉ុន្តែខ្ញុំសង្ឃឹមថាអ្វីៗនឹងល្អ”។
លោក Kuleba បានប្រាប់អ្នកសារព័ត៌មានថា យោធារបស់ទីក្រុងគៀវ បានរៀបចំ “ឃ្លាំងពិសេស” ក្រោមដីចំនួន ៤២៥កន្លែងនៅទូទាំងតំបន់។ មន្ត្រីយោធារូបនេះបានបន្ថែមថា មានជម្រករាប់ពាន់កន្លែង នៅទូទាំងតំបន់រួចហើយ ប៉ុន្តែបានកត់សម្គាល់ថា ពួកគេ “មិនស័ក្តិសម សម្រាប់ការការពារប្រឆាំងនឹង ការគំរាមកំហែងពីវិទ្យុសកម្មនោះទេ” ។
លោកបន្ថែមថា “វាច្បាស់ណាស់ថា ជាដំបូង មនុស្សម្នាក់គួរតែទៅទីជម្រក” ដោយលោកលើកឡើង ពីរបៀបដែលប្រជាពលរដ្ឋគួរតែ រៀបចំសម្រាប់ការវាយប្រហារនុយក្លេអ៊ែរ។ “ជំហានទីពីរ សំខាន់បំផុត គួរតែជាការទំនាក់ទំនង។ ប្រសិនបើមានការវាយប្រហារនុយក្លេអ៊ែរ នោះទំនងជានឹងមិនមានទំនាក់ទំនងទេ។ វត្ថុតែមួយគត់ ដែលនឹងដំណើរការគឺវិទ្យុ ដូច្នេះ វិទ្យុចល័ត ដែលមានថ្មគួរតែត្រូវបានបំពាក់ គ្រប់ទីកន្លែង ដើម្បីឱ្យសញ្ញាអាចទទួលបាន” ៕
ប្រែសម្រួល ឈូក បូរ៉ា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
