គៀវ៖ ទីប្រឹក្សាប្រធានាធិបតី អ៊ុយក្រែន លោក Mykhailo Podolyak បានឲ្យដឹងថា ក្រុងគៀវ អាចបន្តកិច្ចសន្ទនា ជាមួយទីក្រុងមូស្គូបាន លុះត្រាតែមានការដកទ័ពរុស្ស៊ី ចេញពីអ៊ុយក្រែនតែប៉ុណ្ណោះ នេះបើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ។
នៅក្នុងបទសម្ភាសន៍ជាមួយកាសែតអ៊ីតាលី La Repubblica លោក Podolyak បានលើកឡើងថា កិច្ចព្រមព្រៀងបទឈប់បាញ់ ដ៏មានសក្តានុពល នៅដំណាក់កាលបច្ចុប្បន្ន នៃជម្លោះនឹងផ្តល់ឱ្យរុស្ស៊ី នូវពេលវេលា ដើម្បីពង្រឹងជំហររបស់ខ្លួន ។
លោក Podolyak បានបន្ដថា “បទឈប់បាញ់សម្រាប់រុស្ស៊ី គឺជាការផ្អាក យុទ្ធសាស្ត្រ សម្រាប់ការពង្រឹង” ។ ខណៈដែលធ្វើអត្ថាធិប្បាយ លើរបាយការណ៍ ដែលតំណាងរបស់មន្ទីរបញ្ចកោណអាមេរិក និងក្រសួងការពារជាតិរុស្ស៊ី ចូលរួមនៅក្នុងកិច្ចពិភាក្សានោះ លោក Podolyak បានលើកឡើងថា “មិនមានការចរចារវាងរុស្ស៊ី និងបណ្តាប្រទេសលោកខាងលិច ទាក់ទងនឹង អ៊ុយក្រែននោះទេ” ។
លោកបន្ថែមថា “ដៃគូរបស់យើងប្រកាន់ខ្ជាប់ នូវគោលការណ៍ថែលថា “គ្មានអ្វីអំពីអ៊ុយក្រែន ដោយគ្មានការចូលរួមពីអ៊ុយក្រែននោះទេ” ។ ភាគីទាំងសងខាង នឹងមិនអាចធានាការ អនុវត្តកិច្ចព្រមព្រៀងដោយគ្មានការគាំទ្រ ពីប្រជាជនអ៊ុយក្រែនឡើយ”៕
