ឡាហ្គោស៖ទីភ្នាក់ងារព័ត៌មានចិនស៊ិនហួ បានផ្សព្វផ្សាយនៅថ្ងៃទី២៦ ខែវិច្ឆិកា ឆ្នាំ២០២២ថា មន្ត្រីក្នុងតំបន់បានឲ្យដឹងកាលពីថ្ងៃសុក្រថា មនុស្សសរុបចំនួន១៥នាក់បានស្លាប់ និង១១នាក់ផ្សេងទៀតបានរងរបួសនៅក្នុងការវាយប្រហារដោយកាំភ្លើងនាពេលថ្មីៗនេះនៅភាគខាងជើងប្រទេសនីហ្សេរីយ៉ា ។
លោក Samuel Aruwan ស្នងការសន្តិសុខផ្ទៃក្នុង និងកិច្ចការផ្ទះរបស់រដ្ឋ បានឲ្យដឹងនៅក្នុងសេចក្តីថ្លែងការណ៍មួយថា ការវាយប្រហារដ៏សាហាវនេះ បានចាប់ផ្តើមដោយខ្មាន់កាំភ្លើងមិនស្គាល់អត្តសញ្ញាណធ្វើដំណើរទៅកាន់ភូមិចំនួន៤ ក្នុងរដ្ឋ Kaduna ។
ការវាយប្រហារនេះបានកើតឡើងកាលពីថ្ងៃព្រហស្បតិ៍ នៅគ្រាដែលខ្មាន់កាំភ្លើងបានលុកលុយភូមិនានាដើម្បីដណ្តើមយកប្រាក់ ប៉ុន្តែត្រូវបានអ្នកភូមិធ្វើការតបតវិញ ។ កាសែតក្នុងស្រុក The Nation បានរាយការណ៍កាលពីថ្ងៃសុក្រ ។
ប្រភពមួយត្រូវបានគេដកស្រង់សម្ដីថា “ពីទីនោះរឿងបានចាប់ផ្ដើមឡើង” ។
គេបានដឹងថា សម្រាប់ការវាយប្រហារដោយប្រដាប់អាវុធនេះ គឺជាការគំរាមកំហែងផ្នែកសន្តិសុខចម្បងនៅក្នុងផ្នែកខ្លះនៃប្រទេសនីហ្សេរីយ៉ា ដែលបណ្តាលឱ្យមានអ្នកស្លាប់ និងការចាប់ជំរិតមនុស្សជាច្រើននាក់ ៕
ប្រែសម្រួលដោយ៖ ម៉ៅ បុប្ផាមករា
