តម្លៃឧស្ម័នធម្មជាតិនៅអឺរ៉ុប កំពុងឡើងថ្លៃ ខណៈសីតុណ្ហភាព កំពុងធ្លាក់ចុះ

ព្រុចសែល៖ តម្លៃ​ឧស្ម័ន​ធម្មជាតិ​នៅ​អឺរ៉ុប​កំពុង​ឡើង​ថ្លៃ ខណៈ​សីតុណ្ហភាព​ធ្លាក់​ចុះ​ក្នុង​តំបន់ ដែល​បច្ចុប្បន្ន​កំពុង​ស្ថិត​នៅ​ កណ្តាល​វិបត្តិ​ថាមពល នេះបើយោងតាមការចុះផ្សាយ របស់ទីភ្នាក់ងារសារព័ត៌មាន The National។

អនាគតឧស្ម័ន TTF របស់ប្រទេសហូឡង់ ដែលជាកិច្ចសន្យាគោលរបស់អឺរ៉ុប កំពុងជួញដូរនៅតម្លៃ ១៥៧ដុល្លារ ក្នុងមួយម៉ោងមេហ្គាវ៉ាត់កាលពីថ្ងៃពុធ កើនឡើង ១០ ភាគរយបើធៀបនឹងសប្តាហ៍មុន។ ជាមួយនឹងការនាំចេញឧស្ម័នធម្មជាតិ របស់រុស្ស៊ីត្រូវបានកាត់បន្ថយយ៉ាងធ្ងន់ធ្ងរ ទ្វីបនេះកំពុងព្យាយាម ស្វែងរកប្រភពឥន្ធនៈជំនួស។

ទីភ្នាក់ងារប្រឹក្សាថាមពល Rystad Energy បានឲ្យដឹងថា អឺរ៉ុបបាននាំចូលឧស្ម័ន LNG ច្រើនជាង ១១,៤លានតោននៅក្នុងខែវិច្ឆិកា ដែលជាកំណត់ត្រាខ្ពស់ថ្មីមួយ សម្រាប់ឆ្នាំនេះ។

ទីភ្នាក់ងារប្រឹក្សាបានបន្ថែមថា ប្រទេសបារាំង អេស្បាញ និងចក្រភពអង់គ្លេស រួមបញ្ចូលគ្នាមានចំនួនច្រើន ជាងពាក់កណ្តាលនៃ ការនាំចូលសរុបរបស់អឺរ៉ុប។

បណ្តាប្រទេសនៅអឺរ៉ុប បានចុះហត្ថលេខាលើកិច្ចព្រមព្រៀងនាំចូល LNG ជាមួយសហរដ្ឋអាមេរិក និងបណ្តាប្រទេសឈូងសមុទ្រ ក្នុងរយៈពេលប៉ុន្មានខែកន្លងមកនេះ។

កាលពីថ្ងៃពុធ ចក្រភពអង់គ្លេស និងសហរដ្ឋអាមេរិក បានប្រកាសភាពជាដៃគូ ថាមពលថ្មីមួយដែលពួកគេនិយាយថា នឹងជួយកាត់បន្ថយការពឹងផ្អែក របស់អឺរ៉ុបលើឧស្ម័ន និងប្រេងរបស់រុស្ស៊ី ៕

ប្រែសម្រួល ឈូក បូរ៉ា