បរទេស៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយកាលពីថ្ងៃពុធថា ឃ្លាំងអាវុធនុយក្លេអ៊ែររបស់រុស្ស៊ី គឺជាអ្នកធានាដ៏សំខាន់នៃអធិបតេយ្យភាព របស់ប្រទេសរុស្ស៊ី ដោយលោកបានសន្យាថា សព្វាវុធថ្មីនឹងចូលបម្រើការ ក្នុងពេលឆាប់ៗនេះ។ លោកពូទីនបានធ្វើសេចក្តីថ្លែងការណ៍នេះ នៅក្នុងសុន្ទរកថាមួយក្នុងអំឡុងពេល ជួបជាមួយមន្ត្រីការពារជាតិជាន់ខ្ពស់របស់ប្រទេស។
យោងតាមសារព័ត៌មាន RT ចេញផ្សាយនៅថ្ងៃទី២១ ខែធ្នូ ឆ្នាំ២០២២ បានឱ្យដឹងថា នុយក្លេអ៊ែរទាំងបីរួមមាន កាំជ្រួចដែលបាញ់ចេញពីយន្តហោះ នាវាមុជទឹក និងឧបករណ៍បាញ់បង្ហោះចល័តនៅលើដី និងពីឃ្លាំងអាវុធក្រោមដី។
លោក ពូទីន បន្ថែមថា “យើងនឹងបន្តរក្សា និងកែលម្អការត្រៀមខ្លួនប្រយុទ្ធនៃអាវុធនុយក្លេអ៊ែររបស់យើង។ នេះគឺជាការធានាដ៏សំខាន់សម្រាប់ការថែរក្សាអធិបតេយ្យភាព និងបូរណភាពទឹកដីរបស់យើង សមភាពជាយុទ្ធសាស្ត្រ និងតុល្យភាពអំណាចទូទៅនៅក្នុងពិភពលោក”។
លោកប្រធានាធិបតីបានបន្ថែមថា “ចំណែកនៃប្រភេទសព្វាវុធទំនើបនៅក្នុងកងកម្លាំងនុយក្លេអ៊ែរយុទ្ធសាស្ត្ររបស់ [រុស្ស៊ី] មានលើសពី ៩១ភាគរយ នៅឆ្នាំនេះ” ។
លោក ពូទីន បាននិយាយថា មីស៊ីលបាលីស្ទិកអន្តរទ្វីប Sarmat នឹងចូលបម្រើក្នុង “ពេលអនាគតដ៏ខ្លីបំផុត”។ មីស៊ីលនេះអាចហៅបានបានចម្ងាយ ១៨ ០០០ គីឡូម៉ែត្រ ៕
ប្រែសម្រួលៈ ណៃ តុលា
