សេអ៊ូល៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី២ ខែមករា ឆ្នាំ២០២៣ថា ប្រព័ន្ធផ្សព្វផ្សាយរដ្ឋបានរាយការណ៍ថា ប្រទេសកូរ៉េខាងជើង បានបណ្តេញលោក Pak Jong Chon ដែលជាមន្ត្រីយោធាដ៏មានឥទ្ធិពលបំផុតទី២ បន្ទាប់ពីមេដឹកនាំ គីម ជុងអ៊ុន ។
ទីភ្នាក់ងារសារព័ត៌មាន KCNA បានផ្សព្វផ្សាយកាលពីថ្ងៃអាទិត្យថា លោក Pak ដែលជាអនុប្រធាន គណៈកម្មាធិការយោធាមជ្ឈិម នៃគណបក្សពលករដែលកំពុងកាន់អំណាច និងជាលេខា នៃគណៈកម្មាធិការមជ្ឈិមបក្ស ត្រូវបានជំនួសដោយលោក Ri Yong Gil នៅក្នុងកិច្ចប្រជុំប្រចាំឆ្នាំ របស់គណៈកម្មាធិការកាលពីសប្តាហ៍មុន ។
គ្មានហេតុផលសម្រាប់ការផ្លាស់ប្តូរ ត្រូវបានផ្តល់ឱ្យដឹងនោះទេ ។ ក្រុងព្យុងយ៉ាងធ្វើការកែលម្អការដឹកនាំរបស់ខ្លួនជាប្រចាំ ហើយការជួបជុំជប់លៀងចុងឆ្នាំ ត្រូវបានប្រើជាញឹកញាប់ ដើម្បីប្រកាសពីការផ្លាស់ប្តូរបុគ្គលិក និងការសម្រេចចិត្ត គោលនយោបាយធំៗ ។
ទូរទស្សន៍រដ្ឋបានបង្ហាញថា លោក Pak អង្គុយនៅជួរខាងមុខ នៃវេទិកាដោយបានឳនក្បាលចុះ ក្នុងអំឡុងកិច្ចប្រជុំ ខណៈដែលសមាជិកផ្សេងទៀត បានលើកដៃបោះឆ្នោត លើបញ្ហាបុគ្គលិក ។ កៅអីរបស់គាត់ក្រោយមក ត្រូវបានបង្ហាញថា មិនមានកន្លែងអង្គុយទៀតនោះទេ ។
គាត់ក៏បានអវត្តមាននៅក្នុងពិធីថតរូបថត ដែលបានចេញផ្សាយនៅថ្ងៃចន្ទ ដោយទីភ្នាក់ងារព័ត៌មានផ្លូវការ KCNA នៃដំណើរទស្សនកិច្ចថ្ងៃចូលឆ្នាំថ្មី របស់លោក គីម ទៅកាន់វិមាន Kumsusan ដែលជាភូមិគ្រឹះរបស់ជីតា និងឪពុករបស់គាត់មិនដូចកាលពីខែតុលា នៅគ្រាដែលលោក Pak បានអមដំណើរលោក គីម ក្នុងការធ្វើដំណើរទៅកាន់ ព្រះបរមរាជវាំង ដើម្បីប្រារព្ធពិធីជប់លៀង ។
គណៈកម្មាការយោធាកណ្តាលរបស់បក្ស ដែលដឹកនាំដោយលោក គីម ត្រូវបានគេចាត់ទុកថា ជាស្ថាប័នធ្វើការសម្រេចចិត្តផ្នែកយោធា ដ៏មានឥទ្ធិពលបំផុតរបស់ប្រទេសនេះ លើសពីក្រសួងការពារជាតិ ។
ការជំនួសតំណែងរបស់លោក Pak បានកើតឡើងនៅគ្រាដែលលោក គីម បានអំពាវនាវឱ្យមាន ការអភិវឌ្ឍមីស៊ីលផ្លោងអន្តរទ្វីបថ្មី និងឃ្លាំងអាវុធនុយក្លេអ៊ែរធំជាងនេះ ដើម្បីប្រឆាំងនឹងសហរដ្ឋអាមេរិក និងកូរ៉េខាងត្បូង ដែលជាគន្លឹះនៃយុទ្ធសាស្ត្រការពារប្រទេសឯកោ ក្នុងឆ្នាំ២០២៣នេះ ៕ ប្រែសម្រួលដោយ៖ ម៉ៅ បុប្ផាមករា
