រ៉ងហ្គូន៖ ប្រទេសមីយ៉ាន់ម៉ាបានកាត់ទោសមនុស្ស ១១២នាក់ ក្នុងនោះមានកុមារ ១២ នាក់មកពីជនជាតិភាគតិចរ៉ូហ៊ីងយ៉ា បន្ទាប់ពីពួកគេត្រូវបានចាប់ខ្លួន ប៉ុនប៉ងចាកចេញពីប្រទេស នេះបើយោងតាមការចុះផ្សាយ របស់ទីភ្នាក់ងារសារព័ត៌មាន អាល់ហ្សាហ្ស៊ីរ៉ា។
សារព័ត៌មានរដ្ឋ Global New Light of Myanmar បានរាយការណ៍នៅថ្ងៃអង្គារនេះថា តុលាការនៅទីក្រុង Bogale ក្នុងតំបន់ Ayeyarwady ភាគខាងត្បូងនៃប្រទេសមីយ៉ាន់ម៉ា បានកាត់ទោសក្រុមនេះកាលពីថ្ងៃទី៦ ខែមករា។
របាយការណ៍បានឲ្យដឹងថា ក្រុមនេះត្រូវបានចាប់ខ្លួនកាលពីខែធ្នូ បន្ទាប់ពីពួកគេត្រូវបានរកឃើញ នៅលើទូកម៉ូតូ “ដោយគ្មានឯកសារផ្លូវការណាមួយ” ដែលស្របច្បាប់នៅមីយ៉ាន់ម៉ានោះទេ។
ក្នុងចំណោមកុមារទាំង ១២នាក់ មាន ៥នាក់មានអាយុក្រោម១៣ឆ្នាំ កាត់ទោសឱ្យជាប់ពន្ធនាគារ២ឆ្នាំ និងកុមារខ្លះរហូតដល់៣ឆ្នាំ ។ ពួកគេត្រូវបានផ្ទេរទៅ “សាលាបណ្តុះបណ្តាលយុវជន” កាលពីថ្ងៃចន្ទ នេះបើយោងតាមប្រភពពីកាសែតខាងលើ។ អង្គការនេះបានបន្ថែមថា មនុស្សពេញវ័យទាំងអស់ត្រូវបានជាប់ពន្ធនាគាររយៈពេល ៥ ឆ្នាំ។
ជនមូស្លីមរ៉ូហ៊ីងយ៉ាភាគច្រើន ត្រូវបានបដិសេធពីភាពជាពលរដ្ឋ និងសិទ្ធិជាមូលដ្ឋានផ្សេងទៀត នៅក្នុងប្រទេសមីយ៉ាន់ម៉ា ដែលភាគច្រើនកាន់សាសនាព្រះពុទ្ធ ដែលអះអាងថាពួកគេជា “ជនចំណាកស្រុកខុសច្បាប់” មកពីអាស៊ីខាងត្បូង ៕
ប្រែសម្រួល ឈូក បូរ៉ា
