បរទេស៖ រុស្ស៊ី សហរដ្ឋអាមេរិក សហភាពអឺរ៉ុប ចក្រភពអង់គ្លេស ឥណ្ឌា និងប្រទេសផ្សេងទៀត បានថ្កោលទោសកុប្បកម្ម ដោយអ្នកគាំទ្រ អតីតប្រធានាធិបតីប្រេស៊ីល លោក Jair Bolsonaro ដែលបានបន្សល់ទុកនូវការបំផ្លិចបំផ្លាញ ជុំវិញអគារសាធារណៈ កាលពីថ្ងៃអាទិត្យ។
ប្រធានាធិបតីអាមេរិកលោក ចូ បៃដិន បានបរិហារ “ការរំលោភលើលទ្ធិប្រជាធិបតេយ្យ និងការផ្ទេរអំណាចដោយសន្តិវិធី” នៅក្នុងប្រជាជាតិអាមេរិកខាងត្បូង (ប្រេស៊ីល) នេះបើយោងតាមការចុះផ្សាយ របស់ទីភ្នាក់ងារសារព័ត៌មាន The National។
លោក បៃដិន បានសរសេរនៅក្នុងសាររបស់លោក ប៉ុន្មានម៉ោងបន្ទាប់ពីកុប្បកម្មបានចាប់ផ្តើមថា “ស្ថាប័នប្រជាធិបតេយ្យរបស់ប្រទេសប្រេស៊ីល មានការគាំទ្រយ៉ាងពេញទំហឹងរបស់យើង ហើយឆន្ទៈរបស់ប្រជាជនប្រេស៊ីល មិនត្រូវបំផ្លាញឡើយខ្ញុំទន្ទឹងរង់ចាំ បន្តធ្វើការជាមួយលោក Lula” ។
តុលាការកំពូលរបស់ប្រទេសប្រេស៊ីល បានហៅក្រុមបាតុករថា “ភេរវករ” បន្ទាប់ពីពួកគេបានវាយលុកចូលសភាជាតិ វិមានប្រធានាធិបតី និងអគារតុលាការកំពូល ដើម្បីគាំទ្រលោក Bolsonaro ដែលត្រូវបានចាញ់ដោយប្រធានាធិបតី Luiz Inacio Lula da Silva ដែលត្រូវបានគេស្គាល់ថា ជាលោក Lula ។
លោក Bolsonaro មិនទាន់បានសារភាព ចំពោះលោក da Silva ដែលត្រូវបានសម្ពោធចូលកាន់តំណែង កាលពីសប្តាហ៍មុន។ អ្នកនាំពាក្យវិមានក្រឹមឡាំង លោក Dmitry Peskov បានលើកឡើងថា ទីក្រុងមូស្គូ បានថ្កោលទោស “ក្នុងលក្ខខណ្ឌខ្លាំងបំផុត” សកម្មភាពរបស់ពួកកុប្បកម្ម ដោយបន្ថែមថា រុស្ស៊ីបានគាំទ្រលោក da Silva៕ ប្រែសម្រួល ឈូក បូរ៉ា
