ញូវយ៉ក៖ តម្លៃប្រេងបានកើនឡើងកាលពីថ្ងៃសុក្រ ដែលជំរុញដោយសុទិដ្ឋិនិយម ចំពោះតម្រូវការនៅក្នុងប្រទេសចិន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ផ្សារភាគហ៊ុន West Texas Intermediate (WTI) សម្រាប់ការចែកចាយនៅខែកុម្ភៈ បានកើនឡើង ៩៨សេន ឬ ១,២២ ភាគរយ ដើម្បីទូទាត់នៅ ៨១,៣១ដុល្លារអាមេរិកក្នុងមួយបារ៉ែល នៅលើផ្សារហ៊ុន New York Mercantile Exchange។
ប្រេងឆៅ Brent សម្រាប់ចែកចាយនៅខែមីនាបានបន្ថែម ១,៤៧ ដុល្លារ ឬ ១,៧១ ភាគរយ មកនៅ ៨៧,៦៣ ដុល្លារក្នុងមួយបារ៉ែល នៅលើ ផ្សារហ៊ុន London ICE Futures Exchange ។
លោក Vladimir Zernov អ្នកវិភាគទីផ្សារជាមួយនឹងក្រុមហ៊ុនផ្គត់ផ្គង់ព័ត៌មានទីផ្សារ FX Empire បានឲ្យដឹងថា “ទីផ្សារប្រេងបន្តកើនឡើងខ្ពស់ នៅពេលដែលឈ្មួញមានសុទិដ្ឋិនិយម លើការកើនឡើង នៃតម្រូវការរបស់ប្រទេសចិន” ។
លោកបានបន្តថា “នៅសប្តាហ៍ក្រោយតម្រូវការប្រេង របស់ប្រទេសចិន នឹងកើនឡើងខណៈប្រទេសនេះនឹងប្រារព្ធពិធីចូលឆ្នាំចិន ដែលមានសុទិដ្ឋិនិយម សម្រាប់ទីផ្សារប្រេង”។ ពាណិជ្ជករបានបន្តស្រង់ទិន្នន័យស្តុកប្រេង របស់សហរដ្ឋអាមេរិក។
រដ្ឋបាលព័ត៌មានថាមពល របស់សហរដ្ឋអាមេរិក (EIA) បានរាយការណ៍កាលពីថ្ងៃព្រហស្បតិ៍ថា ស្តុកប្រេងឆៅពាណិជ្ជកម្ម របស់ប្រទេសបានកើនឡើង ចំនួន ៨,៤លានបារ៉ែល ក្នុងអំឡុងសប្តាហ៍ដែលបញ្ចប់ នៅថ្ងៃទី១៣ ខែមករា។ ជាមធ្យម អ្នកវិភាគ ដែលត្រូវបានស្ទង់មតិដោយ S&P Global Commodity Insights បានរំពឹងថាការផ្គត់ផ្គង់របស់សហរដ្ឋអាមេរិក នឹងបង្ហាញពីការកើនឡើងចំនួន ០,៩លានបារ៉ែល។
យោងតាម EIA ស្តុកប្រេងសាំងសរុប បានកើនឡើង ចំនួន ៣,៥លានបារ៉ែល កាលពីសប្តាហ៍មុន ខណៈដែលស្តុកប្រេងចម្រាញ់ បានថយចុះចំនួន ១,៩ លានបារ៉ែល៕ ប្រែសម្រួល ឈូក បូរ៉ា
