ប៊ែកឡាំង៖ រដ្ឋមន្ត្រីការបរទេសអាល្លឺម៉ង់លោក Annalena Baerbock បានឲ្យដឹងថា ប្រទេសអាល្លឺម៉ង់ បានត្រៀមខ្លួនរួចជាស្រេចក្នុងការអនុញ្ញាតឱ្យប៉ូឡូញបញ្ជូនរថក្រោះ Leopard ដែលផលិតដោយអាល្លឺម៉ង់ ទៅកាន់អ៊ុយក្រែន ដើម្បីជួយទីក្រុងគៀវ ប្រយុទ្ធប្រឆាំងនឹងការឈ្លានពានរបស់រុស្ស៊ី ប្រសិនបើទីក្រុង Warsaw ធ្វើសំណើបែបនេះ។
លោក Baerbock បានប្រាប់ទូរទស្សន៍ LCI កាលពីថ្ងៃអាទិត្យបន្ទាប់ពីកិច្ចប្រជុំកំពូលបារាំង-អាល្លឺម៉ង់ នៅទីក្រុងប៉ារីសថា “ប្រសិនបើយើងត្រូវបានសួរសំណួរនោះ យើងនឹងមិនឈរនៅក្នុងផ្លូវនោះទេ” ។
លោកបន្ដថា “យើងដឹងថាតើរថក្រោះទាំងនេះមានសារៈសំខាន់ប៉ុណ្ណា ហើយនេះជាមូលហេតុ ដែលយើងកំពុងពិភាក្សារឿងនេះជាមួយដៃគូរបស់យើង។ យើងត្រូវធ្វើឱ្យប្រាកដថាជីវិតមនុស្សត្រូវបានសង្គ្រោះ ហើយទឹកដីអ៊ុយក្រែនត្រូវបានរំដោះ”។
ការអត្ថាធិប្បាយនេះបានលេច ចេញជាសញ្ញាថាទីក្រុងប៊ែរឡាំង បានត្រៀមខ្លួនរួចជាស្រេចក្នុងការអនុញ្ញាតឱ្យបណ្តាប្រទេសអ៊ឺរ៉ុប ចែកចាយរថក្រោះផលិតដោយអាល្លឺម៉ង់ ទៅអ៊ុយក្រែនចំពេលមានសម្ពាធកាន់តែខ្លាំងឡើងពីទីក្រុងគៀវ និងសម្ព័ន្ធមិត្តផ្សេងទៀតសម្រាប់សកម្មភាពបែបនេះ។ នៅក្រោមកិច្ចព្រមព្រៀងអាជ្ញាប័ណ្ណ ប្រទេសនានាមិនអាចបញ្ជូនរថក្រោះអាល្លឺម៉ង់ដោយគ្មានការយល់ព្រមពីទីក្រុងប៊ែរឡាំងនោះទេ។
រហូតមកដល់ពេលនេះ គ្មានរថក្រោះប្រយុទ្ធសំខាន់ៗដែលរចនាដោយលោកខាងលិចត្រូវបានបញ្ជូនទៅអ៊ុយក្រែន សម្រាប់ការប្រយុទ្ធការពារប្រឆាំងនឹងការឈ្លានពានរបស់កងកម្លាំងរុស្ស៊ីឡើយ។
អ៊ុយក្រែនបានទទូចម្តងហើយម្តងទៀតដល់សម្ព័ន្ធមិត្តលោកខាងលិចឲ្យផ្តល់ជំនួយយោធាកាន់តែច្រើន និងលឿនជាងមុនដល់ប្រទេសដែលហែកហួរដោយសង្រ្គាម នេះបើយោងតាមការចុះផ្សាយរបស់ទីភ្នាក់ងារសារព័ត៌មានអាល់ហ្សាហ្ស៊ីរ៉ា។
ប្រភពបន្ថែមថា “រៀងរាល់ថ្ងៃនៃការពន្យារពេលគឺជាការស្លាប់របស់ជនជាតិអ៊ុយក្រែន។ គិតឲ្យលឿនជាងនេះទៅទៀត” នេះបើតាមការលើកឡើងរបស់ទីប្រឹក្សាប្រធានាធិបតីអ៊ុយក្រែន Mykhailo Podolyak៕
