បរទេស៖ រដ្ឋមន្ត្រីការពារជាតិអាល្លឺម៉ង់ លោក Boris Pistorius បាននិយាយថា លោកមិនអាចយល់ពី អ្នកដែលកំពុងតែអបអរលើការ សម្រេចចិត្តរបស់ទីក្រុងប៊ែរឡាំង ក្នុងការបញ្ជូនរថក្រោះ Leopard 2 ទំនើបទៅកាន់ទីក្រុងគៀវនោះទេ។ លោកបានប្រាប់អ្នកកាសែត កាលពីថ្ងៃព្រហស្បតិ៍ថា គ្មានអ្វីរីករាយចំពោះ “សង្រ្គាម” នោះទេ។
យោងតាមសារព័ត៌មាន RT ចេញផ្សាយនៅថ្ងៃទី២៦ ខែមករា ឆ្នាំ២០២៣ បានឱ្យដឹងថា បញ្ហាមួយចំនួនបានបណ្តាលឱ្យ មានភាពខុសគ្នានៃមតិបែបនេះ នៅក្នុងសង្គមអាល្លឺម៉ង់ រដ្ឋមន្ត្រីការពារជាតិរូបនេះ បានទទួលស្គាល់ថា នេះ “បង្ហាញពីការលំបាក… ការសម្រេចចិត្តបែបនេះ” ។ លោក Pistorius បាននិយាយថា លោក “សមានចិត្តទាំងស្រុង” ជាមួយអ្នកដែលមានការព្រួយបារម្ភអំពី “ការបញ្ជូនរថក្រោះទៅកាន់តំបន់សង្រ្គាម” ។
លោក Pistorius បានបន្តថា “ខ្ញុំមានសមានចិត្តតិចតួច សម្រាប់អ្នកដែលរីករាយនឹងស្រែក ‘ហាលេលូយ៉ា’ អំពីការពិតថា មានការចែកចាយ” ដោយបន្ថែមថា “មិនមានហេតុផលសម្រាប់រឿងនោះទេ” ។ «យើងកំពុងតែនិយាយអំពីសង្គ្រាម ហើយគ្មានអ្វីដែលរីករាយឡើយ»។
សូមជម្រាបថា ការអត្ថាធិប្បាយរបស់លោក បានកើតឡើងនៅពេលដែល លោកបានប្រកាសថា រថក្រោះដែលទីក្រុងប៊ែកឡាំង បានសន្យាជាមួយនឹងទីក្រុងគៀវ នៅដើមសប្តាហ៍នេះទំនងជានឹង មកដល់អ៊ុយក្រែន នៅចុងខែមីនាឬដើមខែមេសា។ ទីក្រុងប៊ែកឡាំងបានប្តេជ្ញា ផ្តល់កម្លាំងរថក្រោះពីឃ្លាំង របស់កងទ័ពអាល្លឺម៉ង់ Bundeswehr ដែលរួមមានរថក្រោះ Leopard 2A6 ចំនួន ១៤ គ្រឿង ដែលជាប្រភេទប្រយុទ្ធចុងក្រោយបំផុតមួយ។ អាល្លឺម៉ង់ក៏បាននិយាយដែរថា ខ្លួននឹងអនុញ្ញាតឱ្យប្រទេសផ្សេងទៀត ដែលមានឧបករណ៍ធុនធ្ងន់ផលិតដោយអាល្លឺម៉ង់ក្នុងស្តុក ដើម្បីបញ្ជូនពួកគេទៅអ៊ុយក្រែនបានផងដែរ ៕
ប្រែសម្រួលៈ ណៃ តុលា
