ហ្សឺណែវ៖ សមាជិកនៃអង្គការពាណិជ្ជកម្មពិភពលោក (WTO) បានថ្កោលទោសសហរដ្ឋអាមេរិក ចំពោះការបំពានជាបន្តបន្ទាប់ប្រឆាំងនឹងសេចក្តីសម្រេចរបស់ក្រុមប្រឹក្សាឃ្លាំមើលពាណិជ្ជកម្មពិភពលោកជុំវិញពន្ធនាំចូល និងការដាក់ស្លាកសញ្ញា ដែលមានកំហុសនៃប្រភពដើមទំនិញ ដោយជំរុញឱ្យប្រទេសនេះបំពេញកាតព្វកិច្ចជាសមាជិក WTO និង បញ្ឈប់ចលនាឯកតោភាគី និងការការពារនិយមរបស់ខ្លួន។
នៅក្នុងកិច្ចប្រជុំចុងក្រោយបង្អស់របស់ស្ថាប័នដោះស្រាយវិវាទ (DSB) ដែលធ្វើឡើងនៅទីនេះកាលពីថ្ងៃសុក្រ សមាជិកអង្គការពាណិជ្ជកម្មពិភពលោកចំនួន ៥ដូចជា ចិន ន័រវេស ស្វីស តួកគី និងហុងកុង តម្រូវឱ្យកិច្ចប្រជុំពេញអង្គអនុម័តសេចក្តីសម្រេចចំនួន ៥ក្រុមទាក់ទងនឹងភារកិច្ចដែលដាក់ដោយសហរដ្ឋអាមេរិកលើ ការនាំចូលដែក និងអាលុយមីញ៉ូម និងតម្រូវការសម្គាល់ប្រភពដើមរបស់សហរដ្ឋអាមេរិក ដែលអាចអនុវត្តបានចំពោះទំនិញដែលផលិតនៅហុងកុង។
មុនពេលកិច្ចប្រជុំ សហរដ្ឋអាមេរិកបានប្តឹងឧទ្ធរណ៍លើសេចក្តីសម្រេចរបស់ក្រុមប្រឹក្សាចំនួន ៤ ទាក់ទងនឹងពន្ធដែលដាក់ដោយទីក្រុងវ៉ាស៊ីនតោន លើការនាំចូលផលិតផលដែក និងអាលុយមីញ៉ូមពីប្រទេសចិន ន័រវែស ស្វីស និងតួកគី។
សហរដ្ឋអាមេរិកក៏បានដាក់បណ្តឹងឧទ្ធរណ៍ដាច់ដោយឡែកមួយប្រឆាំងនឹងសេចក្តីសម្រេចមួយទៀតដែលបានចេញកាលពីខែមុន ដែលក្នុងនោះក្រុងវ៉ាស៊ីនតោនបានដាក់ស្លាកផលិតផលខុសដោយចេតនាដែលផលិតនៅហុងកុងថាជាផលិតផលរបស់ចិន។ ការផ្លាស់ប្តូរប្រភពដើមនៃទំនិញទាំងនោះដែលត្រូវនាំចូលទៅសហរដ្ឋអាមេរិកត្រូវបានវិនិច្ឆ័យថា “មិនសមហេតុផល” ។
សេដ្ឋកិច្ចដ៏ធំបំផុតរបស់ពិភពលោកក៏បានប្រកាសថាខ្លួននឹងពន្យារពេលការអនុវត្តរបាយការណ៍របស់ក្រុមប្រឹក្សាទាក់ទងនឹងជម្លោះដែលផ្តួចផ្តើមឡើងដោយសហភាពអឺរ៉ុប ដែលផ្តោតលើការប្រឆាំងការលក់បង្ខូចថ្លៃរបស់សហរដ្ឋអាមេរិក និងពន្ធប្រឆាំងនឹងការនាំចូលអូលីវទុំពីប្រទេសអេស្ប៉ាញ៕ប្រែសម្រួល ឈូក បូរ៉ា
