វ៉ាស៊ីនតោន៖ អ្នកប្រាជ្ញអាមេរិកម្នាក់បានឲ្យដឹងថា នៅពេលដែលប្រទេសជឿនលឿន អាចទទួលរងពីវិបត្តិសេដ្ឋកិច្ចយ៉ាងជ្រៅ “មានតែប្រទេសចិនទេ ដែលជាប្រទេសដែលនឹង បន្តក្លាយជាក្បាលម៉ាស៊ីន ដ៏សំខាន់នៃកំណើនពិភពលោក” ។
ដើម្បីដោះស្រាយជាមួយ ជំងឺរាតត្បាតកូវីដ-១៩ សហរដ្ឋអាមេរិក បានបន្តបោះពុម្ពលុយ ដើម្បីអនុវត្តការជំរុញ និង “ដោយសារតែគោលនយោបាយ យើងមានអតិផរណា។ ដូច្នេះសហព័ន្ធ នឹងដំឡើងអត្រាការប្រាក់បន្ថែមទៀត ហើយយើងអាចនឹងធ្លាក់ ចូលទៅក្នុងវិបត្តិសេដ្ឋកិច្ច” នេះបើតាមការលើកឡើងរបស់លោក Khairy Tourk, សាស្ត្រាចារ្យផ្នែកសេដ្ឋកិច្ចជាមួយសាលា Stuart School of Business នៅវិទ្យាស្ថានបច្ចេកវិទ្យា Illinois ក្នុងទីក្រុង Chicago បានប្រាប់ស៊ីនហួ។
យោងតាមលោក Tourk បណ្តាប្រទេសនៅអឺរ៉ុប ក៏រំពឹងថានឹងមានវិបត្តិសេដ្ឋកិច្ច ដោយសារតែជម្លោះនៅអ៊ុយក្រែន និងវិបត្តិថាមពល នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ។
លោក Tourk បានលើកឡើងថា “ប្រទេសចិន មិនមានបញ្ហានេះទេ (អតិផរណា) ។ អ្វីដែលយើងមាននៅទីនេះ គឺកម្មករដែលមានផលិតភាព ត្រលប់មកធ្វើការក្នុងរោងចក្រវិញ ដូច្នេះពួកគេមានគុណសម្បត្តិប្រកួតប្រជែង”។ “ទីផ្សារចិននឹងក្លាយជាចំណុចភ្លឺ ក្នុងកំណើនពិភពលោក ក្នុងរយៈពេលពីរឆ្នាំខាងមុខ”។
លោកបានបន្ដថា គ្មានប្រទេសណាអាចផ្គូផ្គង ប្រទេសចិនបាននោះទេ នៅពេលនិយាយអំពីការទាក់ទាញ ការវិនិយោគពីបរទេស ជាពិសេសឥឡូវនេះដែល ប្រទេសចិនបានបើកចំហរ ៕
ប្រែសម្រួល ឈូក បូរ៉ា
