អូតាវ៉ា៖ ក្រុមអ្នកស៊ើបអង្កេតកាណាដា កំពុងស្វែងរកបំណែក នៃវត្ថុហោះដ៏អាថ៌កំបាំងមួយ ដែលត្រូវបានបាញ់ទម្លាក់ ដោយយន្តហោះចម្បាំង របស់សហរដ្ឋអាមេរិកនៅលើទឹកដី Yukon ភាគពាយ័ព្យប្រទេស។
នាយករដ្ឋមន្រ្តីកាណាដា Justin Trudeau បានប្រាប់អ្នកយកព័ត៌មានកាលពីថ្ងៃអាទិត្យថា “ក្រុមសង្គ្រោះកំពុងនៅលើដី ដើម្បីស្វែងរក និងវិភាគវត្ថុ” ។ លោកមិនបានផ្តល់តម្រុយថា វាជាអ្វីនោះទេ ប៉ុន្តែបានឲ្យដឹងថា វាតំណាងឱ្យការគំរាមកំហែងសមហេតុផល ចំពោះសុវត្ថិភាពនៃការហោះហើររបស់ជនស៊ីវិល។
លោកបានបន្តថា “សន្តិសុខរបស់ប្រជាពលរដ្ឋ គឺជាអាទិភាពចម្បងរបស់យើង ហើយនោះជាមូលហេតុដែលខ្ញុំ បានសម្រេចចិត្តបាញ់ទម្លាក់វត្ថុមិនស្គាល់អត្តសញ្ញាណនោះ” នេះបើយោងតាមការចុះផ្សាយ របស់ទីភ្នាក់ងារសារព័ត៌មាន អាល់ហ្សាហ្ស៊ីរ៉ា។
អាមេរិកខាងជើង បានប្រុងជើងការខ្ពស់ ចំពោះការឈ្លានពានពីលើអាកាស បន្ទាប់ពីការលេចចេញនៃនាវាអាកាសចរណ៍ចិន ពណ៌សនៅលើមេឃកាលពីដើមខែនេះ។
បាឡុងកម្ពស់ ៦០ម៉ែត្រ (២០០ហ្វីត) ដែលជនជាតិអាមេរិកបាន ចោទប្រកាន់ទីក្រុងប៉េកាំងថា បានប្រើដើម្បីចារកម្មលើសហរដ្ឋអាមេរិក បានបង្កឱ្យមានឧប្បត្តិហេតុអន្តរជាតិ ដែលនាំឱ្យរដ្ឋមន្ត្រីការបរទេសអាមេរិកលោក Antony Blinken លុបចោលការធ្វើដំណើរ ដែលបានគ្រោងទុកទៅប្រទេសចិន។
ប្រទេសចិនបានបដិសេធថា បាឡុងដើមមិនត្រូវបានប្រើប្រាស់ សម្រាប់ការឃ្លាំមើលនោះទេ ដោយនិយាយថា វាជាយានស្រាវជ្រាវស៊ីវិល ហើយបានថ្កោលទោសសហរដ្ឋអាមេរិក ចំពោះការបាញ់ទម្លាក់នៅឆ្នេរសមុទ្រនៃរដ្ឋ South Carolina កាលពីថ្ងៃសៅរ៍មុន ៕
