ប៉េកាំង៖ ទីក្រុងអូតាវ៉ា បានដើរតាមគោលនយោបាយចិន របស់ទីក្រុងវ៉ាស៊ីនតោនយ៉ាងតឹងរ៉ឹង ដែលវាបានធ្លាក់ចូលទៅក្នុងភាពច្របូកច្របល់នៃចិត្ដគំនិត ក្នុងសង្គ្រាមត្រជាក់ និង “ការទូតផ្អែកលើតម្លៃ”។ នេះគឺជាការតំរែតំរង់ ដែលបោះបង់គោលនយោបាយការបរទេស ប្រកបដោយប្រសិទ្ធភាព និងសមហេតុផល។
ប្រទេសកាណាដា បាននិងកំពុងមានភាពតានតឹងជាពិសេសលើប្រទេសចិននាពេលថ្មីៗនេះ។ ទីមួយ វាបានដើរតាមអាមេរិកក្នុងការបំភាន់ដោយចេតនាលើបាឡុងរបស់ចិន និងចូលរួមក្នុងការលេងល្បែងនយោបាយដ៏ច្របូកច្របល់ ខណៈដែលជាក់ស្តែងបានកំណត់គោលដៅចិន។
ក្នុងរយៈពេលប៉ុន្មានសប្តាហ៍កន្លងមកនេះ អ្នកនយោបាយ និងប្រព័ន្ធផ្សព្វផ្សាយកាណាដាមួយចំនួនបានរំជួលចិត្ត ចំពោះការអះអាងដែលថាប្រទេសចិនបានជ្រៀតជ្រែកក្នុងការបោះឆ្នោតសហព័ន្ធកាណាដា និងកិច្ចការក្នុងស្រុក។
កាលពីថ្ងៃពុធ ទីក្រុងអូតាវ៉ាបានឲ្យដឹងថា ខ្លួនបានដឹងពីការប៉ុនប៉ងឃ្លាំមើលដែនអាកាស និងដែនសមុទ្ររបស់ចិន ដែលត្រូវបានរារាំងដោយយោធាកាណាដា នេះបើយោងតាមការចុះផ្សាយរបស់ទីភ្នាក់ងារសារព័ត៌មាន GlobalTime។
ប្រទេសចិន បានចេញនូវការឆ្លើយតបដ៏រឹងមាំ និងត្រឹមត្រូវមួយចំនួន ចំពោះសេចក្តីថ្លែងការណ៍ និងសកម្មភាពអរិភាពទាំងនេះពីប្រទេសកាណាដា។ កាលពីថ្ងៃព្រហស្បតិ៍ អ្នកនាំពាក្យស្ថានទូតចិនប្រចាំប្រទេសកាណាដា បានបដិសេធការអះអាងអំពីការជ្រៀតជ្រែករបស់ចិននៅក្នុងកិច្ចការផ្ទៃក្នុងរបស់ប្រទេសកាណាដា ដោយហៅវាថាជា “ការប្រមាថ និងការបង្កាច់បង្ខូចសុទ្ធសាធ” និងបង្ហាញពី “ការមិនពេញចិត្តយ៉ាងខ្លាំង និងការប្រឆាំងយ៉ាងម៉ឺងម៉ាត់”។ ប្រទេសចិន ក៏បានធ្វើការពន្យល់យ៉ាងលម្អិតអំពីឧប្បត្តិហេតុបាឡុងនេះផងដែរ ប៉ុន្តែកាណាដា នៅតែបញ្ចេញប្រតិកម្មហួសហេតុជាមួយនឹងការជេរប្រមាថ។
ទំនាក់ទំនងចិន-កាណាដាបានស្ថិតក្នុងចំណុចទាបរួចទៅហើយដោយសារកង្វះការយល់ស្របខាងនយោបាយ។ កិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំងពីរ មិនអាចទម្លាយភាពរាំងស្ទះបានទេ។ ហើយប្រទេសទាំងពីរក៏បានប្រឈមមុខនឹងការជាប់គាំងក្នុងការពិគ្រោះយោបល់លើបញ្ហាអន្តរជាតិធំៗ។
ប្រឆាំងនឹងផ្ទៃខាងក្រោយនេះ កងកម្លាំងកាណាដាមួយចំនួននៅតែមិនខិតខំប្រឹងប្រែងក្នុងការលាបពណ៌ចិន ដោយជំរុញឱ្យទីក្រុងអូតាវ៉ា បង្កើនអរិភាពរបស់ខ្លួន ចំពោះទីក្រុងប៉េកាំង ដោយមិនយកចិត្តទុកដាក់ លើការយល់ដឹងរួមរបស់ប្រទេសទាំងពីរអំពីកិច្ចសហប្រតិបត្តិការពីមុន។
នេះបានធ្វើឲ្យប៉ះពាល់យ៉ាងខ្លាំង ដល់ការទុកចិត្តខាងនយោបាយរវាងប្រទេសទាំងពីរ ដែលមានកម្រិតទាប។ ស្ថានភាពបច្ចុប្បន្ននៅក្នុងទំនាក់ទំនងចិន-កាណាដាបានក្លាយជាជនរងគ្រោះ នៃការតស៊ូដោយបក្សពួករបស់ប្រទេសកាណាដាជាយូរមកហើយ។
ទីក្រុងអូតាវ៉ា បានបង្ហាញពីទំនោរជាក់ស្តែងក្នុងការផ្តល់នូវឥរិយាបថអះអាងកាន់តែខ្លាំងឡើង ចំពោះប្រទេសចិន ចាប់តាំងពីការចាប់ផ្តើមយុទ្ធសាស្ត្រឥណ្ឌូប៉ាស៊ីហ្វិករបស់ខ្លួន ដែលជាចក្ខុវិស័យ ដែលពោរពេញទៅដោយការញុះញង់ប្រឆាំងនឹងប្រទេសចិន។
ជាឧទាហរណ៍ ក្រុងអូតាវ៉ាហៅប្រទេសចិនថាជា “មហាអំណាចពិភពលោក ដែលរំខានកាន់តែខ្លាំងឡើង”។ ច្បាស់ណាស់ ការចាត់ទុកប្រទេសចិន ជាការគំរាមកំហែង និងជាបញ្ហាប្រឈម ហើយនឹងជាសម្លេងសំខាន់នៃគោលនយោបាយចិនរបស់កាណាដា សម្រាប់រយៈពេលដ៏យូរមួយ៕ ប្រែសម្រួល ឈូក បូរ៉ា
