ញូវដេលី៖ ក្រុម Quad បានសម្តែងការព្រួយបារម្ភយ៉ាងធ្ងន់ធ្ងរ លើការធ្វើយោធា ក្នុងតំបន់អាស៊ីប៉ាស៊ីហ្វិកនៅឯកិច្ចប្រជុំនៅទីក្រុងញូវ ដែលីប្រទេសឥណ្ឌា នេះបើយោងតាមការចុះផ្សាយ របស់ទីភ្នាក់ងារសារព័ត៌មាន The National។
កិច្ចសន្ទនាសន្តិសុខ Quadrilateral ប្រចាំឆ្នាំ ដែលត្រូវបានគេស្គាល់ជាទូទៅថា Quad គឺជាសម្ព័ន្ធភាពយុទ្ធសាស្ត្រទំលំទូលាយ រវាងសហរដ្ឋអាមេរិក អូស្ត្រាលី ជប៉ុន និងឥណ្ឌា ដែលមានបំណងធានា “ការធ្វើនាវាចរណ៍តាមផ្លូវសមុទ្រ ដោយសេរី និងបើកចំហ” នៅក្នុងតំបន់អាស៊ីប៉ាស៊ីហ្វិក ដែលប្រទេសចិន កំពុងអភិវឌ្ឍហេដ្ឋារចនាសម្ព័ន្ធយោធា និងស៊ីវិល។
ក្រុមនេះត្រូវបានគេមើលឃើញ យ៉ាងទូលំទូលាយថា ជាកម្លាំងការពារប្រឆាំងនឹងឥទ្ធិពល ដែលកំពុងកើនឡើងរបស់ចិនក្នុងតំបន់។ រដ្ឋមន្ត្រីការបរទេសអាមេរិក លោក Antony Blinken រដ្ឋមន្ត្រីការបរទេសជប៉ុន Yoshimasa Hayashi និងសមភាគីឥណ្ឌា និងអូស្ត្រាលី លោក Subrahmanyam Jaishankar និង Penny Wong បានជួបប្រជុំគ្នាយ៉ាងក្តៅគគុក នៃកិច្ចប្រជុំរដ្ឋមន្ត្រីការបរទេស G20 ដ៏តានតឹងដែលត្រូវបានគ្របដណ្ដប់ដោយការឈ្លានពានរបស់រុស្ស៊ីលើអ៊ុយក្រែន។
នៅក្នុងសេចក្តីថ្លែងការណ៍រួមមួយ ដែលមិនបញ្ចេញឈ្មោះប្រទេសចិន ក្រុម Quad បានឲ្យដឹងថា សន្តិភាព និងសន្តិសុខនៅឥណ្ឌូប៉ាស៊ីហ្វិក គឺជាការចាំបាច់ សម្រាប់ការអភិវឌ្ឍន៍ និងវិបុលភាពនៅក្នុងតំបន់ ខណៈពេលដែលបានរំលឹកឡើងវិញ ពីសារៈសំខាន់នៃការគោរពអធិបតេយ្យភាព និងច្បាប់អន្តរជាតិ។
ក្រុមនេះបានឲ្យដឹង នៅក្នុងសេចក្តីថ្លែងការណ៍រួមមួយ បន្ទាប់ពីកិច្ចប្រជុំបិទទ្វារថា “យើងប្រឆាំងយ៉ាងខ្លាំង ចំពោះសកម្មភាពឯកតោភាគីណាមួយ ដែលស្វែងរកការផ្លាស់ប្តូរស្ថានភាពបច្ចុប្បន្ន ឬបង្កើនភាពតានតឹងនៅក្នុងតំបន់”៕ ប្រែសម្រួល ឈូក បូរ៉ា
