វ៉ាស៊ីនតោន៖ ប្រភពរដ្ឋាភិបាលបានឲ្យដឹងថា សហរដ្ឋអាមេរិកបានបញ្ជាក់ថា គ្រាប់រំសេវចិនជាច្រើនគ្រាប់ ត្រូវបានប្រើប្រាស់ក្នុងសមរភូមិ ក្នុងប្រទេសអ៊ុយក្រែន ហើយសង្ស័យថា គ្រាប់ទាំងនោះត្រូវបានបាញ់ ដោយកងកម្លាំងរុស្ស៊ី។
ថាតើគ្រាប់រំសេវត្រូវបានផ្គត់ផ្គង់ ដោយប្រទេសចិន នៅតែមិនទាន់ច្បាស់នៅឡើយ ប្រភពរដ្ឋបាលរបស់សហរដ្ឋអាមេរិកបានឲ្យដឹងថា ខណៈពេលដែលបន្ថែមថា ទីក្រុងវ៉ាស៊ីនតោន នឹងចាត់វិធានការ ប្រសិនបើវាត្រូវបានផ្ទៀងផ្ទាត់ថា ទីក្រុងប៉េកាំង បានធ្វើការផ្គត់ផ្គង់មែននោះ។
ចំពេលមានការខ្វែងគំនិតគ្នាជាច្រើន រវាងសហរដ្ឋអាមេរិក និងចិន ក្រុមមន្ត្រីបានឲ្យដឹង កាលពីពេលថ្មីៗនេះថា ទីក្រុងវ៉ាស៊ីនតោន មានព័ត៌មានសម្ងាត់ ដែលបង្ហាញថាទីក្រុងប៉េកាំងកំពុងពិចារណាបញ្ជូនអាវុធ និងគ្រាប់រំសេវទៅកាន់ប្រទេសរុស្ស៊ី។
មន្ត្រីក្រសួងការបរទេសអាមេរិកម្នាក់ បានប្រាប់ Kyodo News ថា “វាជាអ្វីមួយដែលយើងមានការប្រុងប្រយ័ត្ន និងបន្តឃ្លាំមើលយ៉ាងប្រុងប្រយ័ត្ន” ។ យោងតាមប្រភពបានឱ្យដឹងថា សហរដ្ឋអាមេរិក បានជូនដំណឹងដល់ដៃគូរបស់ខ្លួនមួយចំនួន អំពីការបញ្ជាក់នេះ។
ការបញ្ជាក់នេះបានធ្វើឡើង ខណៈដែលប្រធានាធិបតីចិនលោក ស៊ី ជីនពីង គ្រោងនឹងធ្វើដំណើរទៅកាន់ទីក្រុងម៉ូស្គូ សម្រាប់ដំណើរទស្សនកិច្ចផ្លូវរដ្ឋ រយៈពេល ៣ថ្ងៃចាប់ពីថ្ងៃចន្ទ។ នៅក្នុងដំណើរទស្សនកិច្ចលើកដំបូង ទៅកាន់រុស្ស៊ីចាប់តាំងពីការឈ្លានពានអ៊ុយក្រែន បានចាប់ផ្តើមកាលពីខែកុម្ភៈឆ្នាំមុន លោកស៊ី ជីនពីង ត្រូវបានគេរំពឹងថា នឹងបញ្ជាក់ឡើងវិញនូវទំនាក់ទំនងជិតស្និទ្ធ ជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន៕ ប្រែសម្រួល ឈូក បូរ៉ា
