បរទេស៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានធ្វើដំណើរទៅកាន់តំបន់គ្រីមេ ដើម្បីប្រារព្ធខួបលើកទី៩ នៃការបង្រួបបង្រួមឧបទ្វីបនេះ ជាមួយប្រទេសរុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី១៨ ខែមីនា ឆ្នាំ២០២៣ បានឱ្យដឹងថា ប្រមុខរដ្ឋរុស្ស៊ីលោក ពូទីន បានទៅទស្សនាសាលាសិល្បៈកុមារកាលពីថ្ងៃសៅរ៍ ហើយក៏បានទៅទស្សនា ‘Korsun’ ដែលជាសាខានៃមជ្ឈមណ្ឌលកុមារអន្តរជាតិដ៏ល្បីល្បាញ Artek ដែលមានតាំងពីសម័យសូវៀត ផងដែរ។ លោក ពូទីនក៏បានមើលពីរបៀបដែលការសាងសង់ឧទ្យានប្រវត្តិសាស្ត្រ និងបុរាណវត្ថុ Tauric Chersonesos កំពុងដំណើរការ។
Chersonesos គឺជាអាណានិគមក្រិកបុរាណមួយដែលត្រូវបានបង្កើតឡើងប្រហែល ២ ៥០០ ឆ្នាំមុន ហើយឥឡូវនេះគឺជាតំបន់បេតិកភណ្ឌពិភពលោករបស់អង្គការយូណេស្កូ។
លោក Mikhail Razvozhayev អភិបាលក្រុង Sevastopol បាននិយាយថា អាជ្ញាធរទីក្រុងបានត្រៀមខ្លួនរួចជាស្រេចក្នុងការបើកសាលាសិល្បៈនៅថ្ងៃសៅរ៍ ហើយ “អ្វីគ្រប់យ៉ាងបានត្រៀមរួចរាល់សម្រាប់សន្និសីទតាមវីដេអូ” ជាមួយប្រធានាធិបតី៕
ប្រែសម្រួលៈ ណៃ តុលា
